قازاقستان فۋتبولىنىڭ كوشباسشى ويىنشىلارىنىڭ ءبىرى اسحات تاعىبەرگەن ۇلتتىق قۇرامادان كەتەتىنىن مالىمدەدى.
بۇل تۋرالى سولتۇستىك ماكەدونيامەن بولعان ويىننان كەيىن وتكەن باسپا ءسوز ءماسليحاتىندا باس باپكەر ءالي الييەۆ حابارلادى.
استانا قالاسىندا وتكەن ماچ 0:1 ەسەبىمەن قوناقتاردىڭ جەڭىسىمەن اياقتالدى، دەپ حابارلايدى aqshamnews.kz.
34 جاستاعى جارتىلاي قورعاۋشىنىڭ بۇل شەشىمى تەك كوماندا ءۇشىن عانا ەمەس، بۇكىل ەل ءۇشىن دە كۇتپەگەن مالىمدەمە بولدى.
اسحات قازاقستان قۇراماسىندا 2014 جىلى العاش رەت ونەر كورسەتتى. ال 2021 جىلى كاپيتاندىق مىندەتتى ءوز موينىنا الىپ، كوماندانىڭ تىرەگىنە اينالدى. وسى ۋاقىت ارالىعىندا ول 63 ماچ وتكىزىپ، 3 گول سوعىپ، 7 ناتيجەلى پاس بەرگەن.
ول ۋەلس پەن سان-مارينو قۇرامالارىنا گول سوقسا، دانيا قاقپاسىنا سوققان اتى اڭىزعا اينالعان گولى ارقىلى فيفا-نىڭ پۋشكاش سىيلىعىنا ۇسىنىلدى. ارينە، ماراپات قولىنا تيمەدى، ءبىراق بۇل ءسات ەل فۋتبولىنىڭ التىن قورىنا ەندى.
اسحات – پۋشكاش سىيلىعىنا ۇسىنىلعان قازاقستاننىڭ العاشقى ءارى ازىرگە جالعىز فۋتبولشىسى. ونىڭ دانيا قاقپاسىنا باعىتتاعان زىمىرانداي سوققىسى ءالى كۇنگە دەيىن جانكۇيەرلەردىڭ ەسىندە.
"مەن قۇرامانىڭ جولىندا بارىمدى سالدىم. ەندى ەستافەتانى جاس ويىنشىلارعا تاپسىراتىن كەز كەلدى. وسى جىلدار ىشىندە قولداۋ بىلدىرگەن باپكەرلەرگە، ارىپتەستەرىمە جانە جانكۇيەرلەرگە العىسىم شەكسىز. بۇل – ومىرىمدەگى ەرەكشە كەزەڭ بولدى"، – دەدى اسحات ماچتان كەيىن.
اسحات ازىرگە كلۋب دەڭگەيىندە ونەرىن جالعاستىرىپ جاتىر. ول ءالى دە جوعارى دەڭگەيدە ويناپ، جاس بۋىنعا ۇلگى بولۋدا. ۇلتتىق قۇراماداعى مانسابىن اياقتاۋ كاسىبي تۇرعىدا سالماقتى شەشىم، ءارى ناعىز سپورت شەبەرىنە لايىق قادام.
"تاعىبەرگەن – ۇلگى بولارلىق ويىنشى. ول فۋتبولمەن ءومىر ءسۇردى، ءاردايىم كوماندا ءۇشىن جانىن سالدى. ءبىز ونىڭ الاڭداعى كوشباسشىلىعىن ساعىناتىن بولامىز"، – دەدى ءالي الييەۆ.
جانكۇيەرلەر اسحاتقا شىن جۇرەكتەن العىستارىن بىلدىرۋدە. ونىڭ ەرەن ەڭبەگى، ادالدىعى مەن ەموسياعا تولى ويىندارى قازاقستان فۋتبولىنىڭ تاريحىندا ماڭگى ساقتالادى.