باكۋ – گروزنىي باعىتىنداعى رەيستىڭ اپاتىنان قازا تاپقان AZAL اۆياكومپانياسى Embraer ۇشاعى ەكيپاجى مۇشەلەرىنىڭ تۋىستارى اقتاۋعا كەلدى، - دەپ حابارلايدى aqshamnews.kz ءتىلشىسى Media.az-قا سىلتەمە جاساپ.
اقتاۋعا كەلگەندەردىڭ اراسىندا ازەربايجاننىڭ ۇلتتىق قاھارماندارى حوكۋما الييەۆا، يگور كشنياكين جانە الەكساندر كاليانينوۆتىڭ جاقىندارى، سونداي-اق، اپاتتا كوز جۇمعان بىرنەشە جولاۋشىنىڭ وتباسى مۇشەلەرى بولعان.
مالىمەتكە سايكەس، ساپاردى قازاقستانداعى ازەربايجان كونسۋلدىعى مەن AZAL اۆياكومپانياسى ۇيىمداستىرعان.
"كىنالىلەر لايىق جازاسىن العان كەزدە عانا قايعىمىز جەڭىلدەيدى. قازاقستاندا تۇراتىن وتانداستارىمىزعا كورسەتكەن قولداۋى ءۇشىن العىس ايتامىن"، - دەدى حوكۋما الييەۆانىڭ باۋىرى دجوشگۋن ناسيبلي.
اقتاۋداعى ۇشاق اپاتى تۋرالى نە بەلگىلى؟
ەسكە سالايىق، 2024 جىلى 25 جەلتوقساندا اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل - Azerbaijan Airlines اۋە كومپانياسىنا تيەسىلى Embraer 190 ۇشاعى. ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.