مەملەكەتتىك رامىزدەر كۇنىنە وراي اقتاۋدا داستۇرگە اينالعان پاتريوتتار فورۋمى ءوتتى، دەپ حابارلايدى aqshamnews.kz
اقتاۋ قالالىق ىشكى ساياسات جانە تىلدەردى دامىتۋ ءبولىمىنىڭ تاپسىرىسىمەن وتكەن فورۋم «ەڭبەك – ىرىستىڭ قازىعى» دەگەن اتاۋمەن ۇيىمداستىرىلدى، دەپ حابارلايدى قوعامدىق كوممۋنيكاسيا ورتالىعى قالا اكىمدىگىنىڭ باسپا ءسوز قىزمەتىنە سىلتەمە جاساپ. فورۋمعا قالالىق قوعامدىق كەڭەس وكىلدەرى، انالار جانە اقساقالدار كەڭەسى مۇشەلەرى، مەملەكەتتىك قىزمەتكەرلەر، ءبىلىم، قۇقىق قورعاۋ، دەنساۋلىق ساقتاۋ سالالارىنىڭ وكىلدەرى مەن جاستار قاتىستى.
شارانىڭ باستى ماقساتى – جاستارعا پاتريوتتىق تاربيە بەرۋ، ەڭبەكقورلىقتى ناسيحاتتاۋ جانە ەلگە ادال قىزمەت ەتىپ جۇرگەن قاراپايىم ازاماتتاردىڭ ەڭبەگىن دارىپتەۋ دەيدى شارا ۇيىمداستىرۋشىسى.
- مەملەكەت باسشىسى 2025 جىلدى – «جۇمىسشى ماماندىقتار جىلى» دەپ جاريالادى. وسى ورايدا بۇگىنگى فورۋمعا تەك سپورتشىلار مەن ونەر ادامدارى عانا ەمەس، كۇن سايىن قالانىڭ تىنىس-تىرشىلىگىنە ۇلەس قوسىپ جۇرگەن قاراپايىم جۇمىسشى ماماندار دا قاتىسىپ وتىر. ۇيلەرىمىزدىڭ جارىعى سونبەي، جىلۋى ۇزىلمەي تۇرۋى – سول كىسىلەردىڭ ەرەن ەڭبەگىنىڭ ناتيجەسى. ولار – شىنايى پاتريوتتار. ءبىز ولاردىڭ ۇلگىلى ىستەرىن جاستارعا ونەگە رەتىندە كورسەتۋىمىز كەرەك، – دەدى «ماڭعىستاۋ جەرگىلىكتى باستاما ورتالىعى» قوعامدىق قورىنىڭ باسشىسى جاقسىگۇل ماحانبەتوۆا.
شارا سوڭىندا قالانىڭ ۇزدىك پاتريوت جاستارى ماراپاتتالدى. سونداي-اق قاتىسۋشىلار «اتامەكەن» ءانى اياسىندا كوك تۋدى جەلبىرەتىپ بەلسەندىلىك تانىتتى.