اقسۋ قالاسىندا 5 جاسار قىز بالا ىستىق سۋ تولعان شۇڭقىرعا قۇلاپ، كۇيىك جاراقاتىمەن اۋرۋحاناعا جەتكىزىلدى، دەپ حابارلايدى Aqshamnews.kz.
كۋاگەرلەردىڭ ايتۋىنشا، وقىس جاعداي بالالار ويناپ جۇرگەن اۋلا ماڭىندا، قۇبىر جارىلۋ سالدارىنان پايدا بولعان شۇڭقىردا بولعان.
اقسۋ اكىمدىگى وقيعانى راستادى. قىز بالا 6 قىركۇيەك كۇنى ساعات شامامەن 17:30-دا اۋەزوۆ كوشەسىندە، دۇكەندەردىڭ ءبىرىنىڭ جانىندا اپاتتى جەرگە ءتۇسىپ كەتكەن.
«بالا ىستىق سۋ قۇبىرى جارىلىپ، پايدا بولعان شۇڭقىرعا قۇلاعان. دەنە مەن اياقتارىنىڭ I–III دارەجەلى كۇيىگى بار. پاۆلودار وبلىستىق بالالار اۋرۋحاناسىنا جەتكىزىلدى. جالپى كۇيىك اۋماعى – 17 پايىز»، – دەپ مالىمدەدى اكىمدىكتەگىلەر.
ءقازىر ءبۇلدىرشىننىڭ جاعدايى ورتاشا اۋىر دەپ باعالانۋدا. ول تراۆماتولوگيا بولىمىندە ەم قابىلداپ جاتىر.
قالانىڭ كوممۋنالدىق قىزمەتتەرى وقيعاعا قاتىستى ازىرگە تۇسىنىكتەمە بەرگەن جوق.