اقش-تان ءوز ەركىمەن قايتاتىن قازاقتارعا جولاقى تولەنەدى

اقش-تا زاڭسىز جۇرگەن قازاقتارعا ەلگە قايتۋ ءۇشىن 1 مىڭ دوللاردان بەرىلەدى، دەپ حابارلايدى aqshamnews.kz
 
سىرتقى ىستەر ءمينيسترىنىڭ ورىنباسارى الىبەك قۋانتىروۆ قازاقستاندىقتاردى اقش-تان دەپورتاسيالاۋعا قاتىستى ءمان-جايدى ايتتى.

ونىڭ سوزىنشە، قازاقستاندىقتار شەتەلدە زاڭسىز جۇرسە بۇل ولاردىڭ جاۋاپكەرشىلىگى. 

"ءتيىستى اقپارات بەرىلدى، ول ەكى تاراپتا دا جاريالاندى. اقش تاراپى ەلدە ەركىن جۇرۋگە قاتىستى وزگەرىس جاسادى. ءوز ەركىمەن كەتەتىندەردىڭ جولىن تولەيدى. جاڭا باعدارلاما بويىنشا مىڭ دوللار كولەمىندە وتەماقى بەرەدى. ال سانعا قاراساق، جاقىندا 19 ازامات ءوز ەركىمەن كەلدى. بۇل وتە از. باسقا ەلدەرگە قاراعاندا از. سەبەبى ءبىزدىڭ ازاماتتار ول ايماقتا زاڭدى تۇردە ءجۇر. كونسۋلدىق ەسەپتە 3،7 مىڭ ازامات ەسەپتە تۇر"، دەيدى قۋانتىروۆ. 

ەسكە سالايىق، بۇعان دەيىن قازاقستاننىڭ اقش-تاعى ەلشىلىگى ەلدە زاڭسىز جۇرگەن ادامدارعا ۇندەۋ جاساعان بولاتىن. 

ەلشىلىك مالىمەتىنشە، اقش ىشكى قاۋىپسىزدىك مينيسترلىگى ەلدە زاڭسىز جۇرگەن ازاماتتار ءۇشىن ءوز ەركىمەن قايتۋعا مۇمكىندىك بەرەتىن جاڭا باعدارلاما قابىلداعانىنا نازار اۋدارعان.

بۇل باعدارلاما اياسىندا ءوز ەركىمەن قايتام دەۋشىلەرگە قايتۋ بيلەتى تولىق تولەنىپ، ەلگە جەتكەن سوڭ 1000 اقش دولل. كولەمىندە قارجى ءبولۋ قاراستىرىلعان.

ول ءۇشىن CBP Home ءموبيلدى قوسىمشاسى ارقىلى ءوتىنىش بەرۋ قاجەت.

اقش ىشكى قاۋىپسىزدىك ءمينيسترى كريستي نوەم بۇل باعدارلاماعا قاتىستى پىكىر بىلدىرگەن.