وسى اپتادا كوروناۆيرۋسقا قارسى 5 پەن 11 جاس ارالىعىنداعى بالالاردى ەگۋ شاراسى باستالادى، دەپ حابارلايدى almaty-akshamy.kz «حابار 24» سىلتەمە جاساپ.
ول ءۇشىن Pfizer BioNTech كومپانياسىنىڭ ەكپەسى تاڭدالدى. پرەپاراتتى وتكەن جۇما كۇنى ەلدىڭ ازىق-تۇلىك جانە دارى-دارمەكتى سانيتارلىق قاداعالاۋ باسقارماسى قولدانۋعا رۇقسات بەردى. اق ءۇيدىڭ مالىمدەۋىنشە، جۋىق ارادا ەكپە ورتالىقتارىنا ميلليونداعان دوزا جەتكىزىلەدى.
ۇكىمەت وسى جاستاعى 28 ميلليون بالاعا جەتكىلىكتى دارەجەدە دوزا ساتىپ العان. مامانداردىڭ ايتۋىنشا، ەكپەنىڭ كوۆيدكە قارسى قورعانىشى - 90 پايىز.
اقش-تا وسى ۋاقىتقا دەيىن 18 جاسقا دەيىنگى 6 ميلليون بالادان كوروناۆيرۋس انىقتالعانىن بىلەمىز. ولاردىڭ 2 ميلليونى 5 پەن 11 جاس ارالىعىنداعى بۇلدىرشىندەر. بۇل بالالاردى جەدەل ۆاكسينالاۋ قاجەت ەكەنىن كورسەتىپ وتىر. مەن ءوزىم ەكى بالانىڭ اكەسىمىن. بۇل – اتا-انالار ءۇشىن قيىن تاڭداۋ. ءبىراق بالالارىمىزدى جۇقپالى دەرتتەن قورعاۋدىڭ ەڭ ءتيىمدى جولى وسى، - دەدى دارىگەر مەتيۋ حارريس.
ايتا كەتەيىك، بۇعان دەيىن «مودەرنا» كومپانياسى دا كوروناۆيرۋسقا قارسى 6 مەن 11 جاس ارالىعىنداعى بالالارعا ارنالعان ەكپە جاساپ شىعارعانىن مالىمدەگەن ەدى. ءبىراق بىرلەستىك وتكەن جەكسەنبى كۇنى اقش-تىڭ رەتتەۋشى ورگانىنا ونى قولدانۋعا ءوتىنىش بەرۋدى كەيىنگە قالدىراتىنىن مالىمدەدى.