قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋدىڭ امەريكا قۇراما شتاتتارىنا رەسمي ساپارى اياسىندا قازاقستان رەسپۋبليكاسى پرەزيدەنتىنىڭ ەكونوميكالىق ماسەلەلەر جونىندەگى كومەكشىسى قانات شارلاپايەۆتىڭ توراعالىعىمەن دوڭگەلەك ۇستەل ءوتتى.
ءىس-شاراعا امەريكالىق ترانسۇلتتىق كورپوراسيالار، ينۆەستيسيالىق قورلار مەن قازاقستان رەسپۋبليكاسىنىڭ مەملەكەتتىك ورگاندارىنىڭ وكىلدەرى قاتىستى. ولاردىڭ قاتارىندا ق ر سىرتقى ىستەر مينيسترلىگىنىڭ ينۆەستيسيالار كوميتەتىنىڭ ءتوراعاسى عابيدوللا وسپانقۇلوۆ بولدى.
كەزدەسۋ بارىسىندا ينۆەستيسيالىق سەرىكتەستىكتىڭ باسىم باعىتتارى، ونىڭ ىشىندە شيكىزاتتىق ەمەس سەكتورلاردى دامىتۋ، ورنىقتى ءوسۋ تەحنولوگيالارى، ينفراقۇرىلىم جانە ءوندىرىستى جەرگىلىكتەندىرۋ ماسەلەلەرى تالقىلاندى. قازاقستاندىق تاراپ اقش-تى ەل ەكونوميكاسىنا 62 ملرد اقش دوللارىنان استام تىكەلەي ينۆەستيسيا سالعان ءىرى ينۆەستور رەتىندە اتاپ ءوتىپ، ىنتىماقتاستىقتى ودان ءارى تەرەڭدەتۋدىڭ ماڭىزدىلىعىن جەتكىزدى.
ع.وسپانقۇلوۆ اقش بيزنەسىنىڭ قازاقستانعا دەگەن قىزىعۋشىلىعى ارتىپ كەلە جاتقانىن اتاپ ءوتتى: «اقش – ءبىزدىڭ نەگىزگى ستراتەگيالىق سەرىكتەسىمىز. بۇگىندە قازاقستاندىق نارىقتا ءىرى امەريكالىق كومپانيالار تابىستى جۇمىس ىستەۋدە، جانە ءبىز ولاردىڭ قاتارىن كەڭەيتۋگە مۇددەلىمىز. ءبىز تەك كاپيتال تارتۋعا ەمەس، بىرلەسكەن وندىرىستەردى ىسكە قوسۋعا، وزىق تەحنولوگيالاردى ەنگىزۋگە جانە جاڭا ەكسپورتتىق تاۋاشالاردى دامىتۋعا ۇمتىلامىز. بۇگىنگى كەزدەسۋ جاڭا جوبالارعا قوسىمشا سەرپىن بەرەدى دەپ سەنەمىز».
سونداي-اق ساپار اياسىندا اقش ساۋدا پالاتاسىنىڭ تاياۋ شىعىس، تۇركيا جانە قازاقستان بويىنشا ۆيسە-پرەزيدەنتى دجەننيفەر ميلمەن كەزدەسۋ ءوتتى. تاراپتار قازاقستان مەن اقش اراسىنداعى ىسكەرلىك سەرىكتەستىكتىڭ اعىمداعى جاي-كۇيىن جانە قازاقستاندىق-امەريكالىق ىسكەرلىك كەڭەس اياسىنداعى ءوزارا ءىس-قيمىلدى كەڭەيتۋ جولدارىن تالقىلادى. اسىرەسە قازاقستاننىڭ امەريكالىق بيزنەس قاۋىمداستىعى اراسىندا تانىمالدىلىعىن ارتتىرۋ جانە ناقتى ينۆەستيسيالىق باستامالاردى ىسكە اسىرۋ ماسەلەلەرىنە باسا نازار اۋدارىلدى.
بۇدان بولەك، كوميتەت باسشىسى «Jones Equity Fund»، «Heeney Capital»، «Honeywell»، «IG Global»، «Amazon Kuiper»، «Jennmar» جانە باسقا دا كومپانيالارمەن ءبىرقاتار ەكىجاقتى كەزدەسۋلەر وتكىزدى.
قازاقستان تاراپى جوبالاردى تولىق سۇيەمەلدەۋگە، سونىڭ ىشىندە اكىمشىلىك قولداۋ كورسەتۋگە، مەملەكەتتىك قولداۋ شارالارىنا جانە جەرگىلىكتى سەرىكتەستەردى ىزدەۋگە دايىن ەكەنىن راستادى.