الماتىنىڭ شەتكى شاعىناۋداندارىندا جول سالۋ مەن جوندەۋ جۇمىستارى – ەرەكشە باقىلاۋدا

مەگاپوليس اكىمى باقىتجان ساعىنتايەۆ «الماتى» تەلەارناسىنداعى Akimat LIVE باعدارلاماسىنىڭ تىكەلەي ەفيرىندە وسىلاي دەدى.

قالا باسشىسى الماتىلىقتاردىڭ سۇراقتارىنا جاۋاپ بەرە كەلىپ، اعىمداعى جىلى 100 شاقىرىمنان اساتىن جاڭا جولداردى سالۋدىڭ جوسپارلانعانىن ايتتى، دەپ حابارلايدى Almaty-akshamy.kz

بەلگىلى بولعانداي، كوپتەگەن جىلدار بويى ينجەنەرلىك جانە الەۋمەتتىك ينفراقۇرىلىمسىز قالعان الماتى وبلىسىنىڭ ەلدى مەكەندەردىڭ قوسىلۋىنا بايلانىستى قالا اۋماعى بىرنەشە رەت ۇلعايدى. جولداردى، سۋمەن جابدىقتاۋ جانە سۋدان بۇرۋ جەلىلەرىن، بالاباقشالاردى، مەكتەپتەر مەن ەمحانالاردى سالۋعا بارلىق كۇش جۇمىلدىرىلعانىن اتاپ ءوتتى باقىتجان ساعىنتايەۆ. بۇل ماسەلە الماتى اكىمىنىڭ تۇراقتى باقىلاۋىندا.

2021 جىلى الاتاۋ، تۇركسىب جانە ناۋرىزباي اۋداندارىنداعى سەگىز شاعىن اۋدانىندا جاڭا جولدار سالۋ جوسپارلانۋدا. بۇلار – وجەت، شاڭىراق-5، سامعاۋ، نۇرشاشقان، قۇرامىس، المەرەك، قايرات، العاباس شاعىناۋداندارى. وسى شاعىناۋداندارداعى 415 كوشەدە ۇزىندىعى 108 كم جاڭا جولدار سالىناتىن بولادى.

سونىمەن بىرگە دۋمان شاعىناۋدانىنداعى ۇزىندىعى 30،5 كم بولاتىن 53 كوشەدە جولداردى كۇردەلى جوندەۋ جۇمىستارى ءجۇرىپ جاتىر. ونىڭ ىشىندە ۇزىندىعى 5،6 كم بولاتىن 11 كوشەدە جۇمىس اياقتالدى. قالعان 42 كوشەنى اياقتاۋ اعىمداعى جىلدىڭ قىركۇيەگىنە دەيىن جوسپارلانعان.

بۇدان وزگە، ۇزىندىعى 227،5 كم بولاتىن 225 كوشەدە جول جابىنىن جوندەۋ جوسپارلانۋدا. قازىرگى كەزدە 66 كوشەدە، ونىڭ ىشىندە 12 ماگيسترالدى جانە 54 جەرگىلىكتى ماڭىزى بار كوشەلەردە، جۇمىس ءجۇرىپ جاتىر.