ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىندە «اسكەر بالالار كوزىمەن» تاقىرىبىندا اشىق ەسىك كۇنى ۇيىمداستىرىلدى.
شارانىڭ ماقساتى – قازاق اسكەرىنىڭ مارتەبەسىن كوتەرۋ، اسكەري ماماندىقتاردى ناسيحاتتاۋ جانە جاس ۇرپاقتى وتانسۇيگىشتىككە تاربيەلەۋ. ءىس-شاراعا الماتى قالاسى الاتاۋ اۋدانىنا قاراستى مەكتەپتەردەن «جاس بۇركىت»، «جاس سارباز» اسكەري-پاتريوتتىق كلۋبتارى مەن قوزعالىسىنا مۇشە 100-دەن استام وقۋشى قاتىستى.
اشىق ەسىك كۇنى قازاقستان رەسپۋبليكاسى ۇلتتىق ۇلانىنىڭ «ۇلتتىق ۇلان – ەل ايبىنى!» رەسپۋبليكالىق اكسياسى اياسىندا جانە قازاقستان رەسپۋبليكاسىنىڭ تاۋەلسىزدىك كۇنىنە وراي وتكىزىلدى.
وقۋشىلار الدىمەن اسكەري ءبولىمنىڭ كازارمالىق عيماراتتارىن ارالاپ، جاۋىنگەرلەردىڭ كۇندەلىكتى تىرشىلىگىمەن تانىستى. اسكەري ءبولىمنىڭ تاريحى مەن جاۋىنگەرلىك جولى تۋرالى اقپارات بەرىلدى. سونداي-اق اك-74 اۆتوماتى جانە وزگە دە قارۋ-جاراق ۇلگىلەرى كورسەتىلىپ، اسكەري كيىم نىساندارى تانىستىرىلدى. اسكەري تەحنيكالار مەن كولىكتەردىڭ مۇمكىندىكتەرى ءتۇسىندىرىلىپ، ولاردى قولدانۋ ەرەكشەلىكتەرى تۋرالى مالىمەت بەرىلدى.
- بۇگىن ءبىز ءۇشىن اسكەري ومىرمەن ەتەنە تانىسۋعا ۇلكەن مۇمكىندىك بولدى. قارۋ-جاراق، اسكەري فورما، تەحنيكا – ءبارى وتە اسەرلى. ساربازداردىڭ دايىندىعى مەن ءتارتىبى، قارۋمەن جۇمىس ىستەۋ شەبەرلىگى مەنى قاتتى قىزىقتىردى. وسىنداي قۋاتتى ارميامىز بارىن ماقتان تۇتامىن. بولاشاقتا مەن دە وتان الدىنداعى بورىشىمدى وتەۋدى ارماندايمىن، - دەدى №156 مەكتەپتىڭ 11-سىنىپ وقۋشىسى ەدىلباي داۋلەت.
مەكتەپ ۇجىمى مەن اسكەري ءبولىم باسشىلىعى مۇنداي ءىس-شارالار جاستاردىڭ بويىندا پاتريوتتىق رۋحتى قالىپتاستىرىپ، بولاشاق ماماندىق تاڭداۋعا وڭ ىقپال ەتەتىنىن اتاپ ءوتتى.
شارا سوڭىندا الاتاۋ اۋداندىق ءبىلىم ءبولىمىنىڭ اسكەري ادىسكەرى ەcبولات ۋالييەۆ پەن №210 مەكتەپ-ليسەي ديرەكتورىنىڭ تاربيە ءىسى جونىندەگى ورىنباسارى الماگۇل سارماقوۆا اسكەري ءبولىم باسشىلىعىنا جاستارعا ارنالعان تاعىلىمدى ءىس-شارا ۇيىمداستىرعانى ءۇشىن العىس ءبىلدىردى.