جۋىردا 16 جاسار جانسۇلتان “قازاقستان رەسپۋبليكاسى كونستيتۋسياسىنىڭ 30 جىلدىعىنا بايلانىستى راقىمشىلىق جاساۋ تۋرالى" زاڭ بويىنشا بوستاندىققا شىقتى.
جانسۇلتاننىڭ اتا-اناسى اجىراسىپ، ول ىنىلەرىمەن كوزى كورمەيتىن اجەسىنىڭ قولىندا قالادى. بالا كوڭىل ءوزىنىڭ قۇرداستارى سياقتى جاقسى كيىنىپ، جاقسى تاماق ءىشۋدى اڭسايتىن. الايدا اجەسىنىڭ زەينەتاقىسى ءبىر ءۇيلى جانعا جەتپەيتىن. ءسويتىپ ءالى وڭ-سولىن تانىپ ۇلگەرمەگەن 14 جاسار جانسۇلتان ۇرلىق جاساپ، الماتىداعى كامەلەتكە تولماعانداردى ۇستاۋعا ارنالعان قاۋىپسىزدىگى ورتاشا مەكەمەسىنەن ءبىر-اق شىققان ەدى. باس بوستاندىعىنان ايىرىلعان ءجاسوسپىرىم بالالار كولونياسىندا ءجۇرىپ مەكەمە ىشىندەگى ورتا مەكتەپتە وقىدى، سونداي-اق ءتۇرلى تاربيەلىك ءىس -شارالارعا بەلسەندى قاتىسقانى جانە جاقسى مىنەز-قۇلقى ءۇشىن ماراپاتتارعا يە بولعان.
1 جىل 3 ايدان كەيىن راقىمشىلىققا ىلىككەن ءجاسوسپىرىمدى مەكەمە قىزمەتكەرلەرى زاڭدا قاراستىرىلعانداي جولاقىسىن تولەپ، ماڭعىستاۋ وبلىسىنداعى تۇرعىلىقتى جەرىنە وزدەرى جەتكىزىپ سالۋعا الىپ كەتتى.
بوستاندىققا شىققان جانسۇلتان تەمىر توردا ءجۇرىپ ەركىندىكتىڭ ءقادىرىن تۇسىنگەنىن جانە بولاشاقتا دۇرىس ءومىر سۇرەتىنىن ايتىپ، وزىنە ءتالىمدى تاربيە بەرگەن، جارقىن ومىرگە جول سىلتەگەن مەكەمە قىزمەتكەرلەرى مەن ۇستازدارىنا العىسىن تەبىرەنە جەتكىزدى.