ۇزىندىعى 2،3 كم بولاتىن ەكى جەرۇستى جاياۋ جۇرگىنشىلەر وتكەلىن، تروتۋارلار مەن ۆەلوسيپەد جولدارىن سالۋ جانە كوشەلەردى جارىقتاندىرۋ قاراستىرىلعان.
الماتى اكىمى باقىتجان ساعىنتايەۆ «الماتى» تەلەارناسىنداعى جول ينفراقۇرىلىمىن دامىتۋ جونىندەگى ونلاين-تانىستىرىلىم بارىسىندا سالىنىپ جاتقان ءۇش جولايرىق تۋرالى ايتتى، دەپ حابارلايدى Almaty-akshamy.kz.
بۇقتىرما كوشەسى - قۇلجا تراكتى بويىنداعى جولايرىقتىڭ قۇرىلىسى ىرگەلەس ورنالاسقان شاعىناۋداندار مەن 300 مىڭعا جۋىق تۇرعىنى بار الماتى وبلىسىنىڭ قالا ماڭىنداعى ەلدى مەكەندەرىن قالانىڭ ورتالىق بولىگىنە جانە الماتى حالىقارالىق اۋەجايىنا قولجەتىمدى ەتۋگە باعىتتالعان.
جولايرىقتىڭ قۇرىلىسى قۇلجا تراكتىسىنىڭ كولىك وتكىزۋ قابىلەتىن تاۋلىگىنە 77 مىڭ كولىككە دەيىن ارتتىرادى، ال بۇقتىرما كوشەسىندەگى كولىك قوزعالىسى تاۋلىگىنە 60 مىڭعا دەيىن ۇلعايادى.
جوبا بويىنشا، بۇقتىرما كوشەسى بويىنا (570 م) تۋننەلدى بولىگى بار ءۇش دەڭگەيلى جولايرىقتى، قۇلجا تراكتىسى بويىنا (783 م) ەستاكاداسى بار ءۇش جولاقتى جانە ولاردىڭ قيىلىسىنداعى اينالمالى قوزعالىستى قامتاماسىز ەتەتىن كىرەبەرىستەردى سالۋ قاراستىرىلعان.
اعىمداعى جىلى جەكەلەگەن كىرە بەرىستەر مەن باعىتتار بويىنشا كولىك قوزعالىسىن ءىشىنارا اشۋ جوسپارلانۋدا. كەلەر جىلى قۇرىلىس تولىق اياقتالادى.
سەيفۋللين داڭعىلى – جانسۇگىروۆ كوشەسىنىڭ قيىلىسىندا تۋننەل تۇرىندەگى جولايرىق سالىنۋدا. جوبا بويىنشا، سەيفۋللين داڭعىلى بويىمەن كولىكتىڭ كەدەرگىسىز جۇرۋىنە ارنالعان جالپى ۇزىندىعى 690 مەترلىك ەكى تۋننەل سالۋ قاراستىرىلعان.
جانسۇگىروۆ كوشەسى بويىندا جانە كىرە بەرىستەگى كولىك قوزعالىسى جەر دەڭگەيىندە وتەدى. سونداي-اق، 4 جەرۇستى جاياۋ جۇرگىنشى وتكەلىنىڭ، تروتۋارلاردىڭ قۇرىلىسى، اۋماقتى اباتتاندىرۋ جانە كوگالداندىرۋ جۇمىستارى قاراستىرىلعان.
جولايرىقتاردىڭ قۇرىلىسى ءقازىردىڭ وزىندە اياقتالعان نازاربايەۆ داڭعىلىن تەمىرجول بويىمەن وتەتىن ەستاكادامەن بىرگە سولتۇستىك-وڭتۇستىك كولىك اعىندارىن بولۋگە مۇمكىندىك بەرەدى. سەيفۋللين داڭعىلىنىڭ وتكىزۋ قابىلەتى تاۋلىگىنە 65 مىڭ كولىكتى، جانسۇگىروۆ كوشەسىندە تاۋلىگىنە 76 مىڭ كولىكتى وتكىزەتىن بولادى. جوبانى اياقتاۋ 2021 جىلدىڭ جەلتوقسانىنا جوسپارلانعان.
رىسقۇلوۆ داڭعىلى – ەمسوۆ كوشەسى بويىنداعى جولايرىق كىرە بەرىستەرى مەن باعىتتتارى بار رىسقۇلوۆ داڭعىلى ارقىلى وتەتىن كوپىردى قامتيدى. ەستاكادانىڭ ۇزىندىعى – 186 مەتر. جەرۇستى جاياۋ جۇرگىنشىلەر وتكەلىنىڭ قۇرىلىسى قاراستىرىلعان.
بۇل جولايرىق پايدالانۋعا بەرىلگەن كەزدە رىسقۇلوۆ داڭعىلىنىڭ كولىك وتكىزۋ قابىلەتى تاۋلىگىنە 80 مىڭعا دەيىن، ال ەمسوۆ كوشەسىندە تاۋلىگىنە 40 مىڭ كولىككە دەيىن ارتاتىن بولادى.
بيىل سايىن مەن موڭكە بي كوشەلەرىنىڭ قيىلىسىندا جولايرىقتىڭ قۇرىلىسىن باستاۋ جوسپارلانۋدا. ول «جوڭىشقا جاپىراعى» تيپتەس، ءتۇرلى باعىتتارى ءارى كىرە بەرىستەرى بولادى.
ۇزىندىعى 2،3 كم بولاتىن ەكى جەرۇستى جاياۋ جۇرگىنشىلەر وتكەلىن، تروتۋارلار مەن ۆەلوسيپەد جولدارىن سالۋ جانە كوشەلەردى جارىقتاندىرۋ قاراستىرىلعان. جولايرىعىنىڭ وتكىزۋ قابىلەتى تاۋلىگىنە 100 مىڭ كولىكتى قۇرايتىن بولادى.