الماتىدا ءۇندى شتامىنىڭ تارالۋىنا بايلانىستى كوروناۆيرۋستىڭ ءتورتىنشى تولقىنى باستالدى

جانداربەك  بەكشين بارلىق ىندەتتەر تولقىن ءتارىزدى اعىممەن سيپاتتالاتىنىن ايتتى.

الماتى قالاسىنىڭ باس سانيتارلىق دارىگەرى جانداربەك بەكشين مەگاپوليستە كوروناۆيرۋس جۇقتىرعانداردىڭ سانى نەلىكتەن تەز وسكەنىن ءتۇسىندىردى، دەپ حابارلايدى Almaty-akshamy.kz

«ەپيدەميولوگيالىق احۋالدىڭ ناشارلاۋىنىڭ باستى سەبەبى ۆيرۋستىڭ جاڭا شتامدارىنىڭ پايدا بولۋىنان. دەرتتىڭ كۇرت ءوسۋىن كوروناۆيرۋستىڭ "ءتورتىنشى تولقىنى" دەپ اتاۋعا بولادى. ءبىز دەرتكە قارسى تۇرا الامىز، ءقازىردىڭ وزىندە 3 500 توسەك-ورىن دايىندالدى. قازىرگى كەزدە ناۋقاستارعا ارنالعان 1 760 توسەك-ورىن بار. ولاردىڭ سانىن 35%-عا ارتتىرامىز»، – دەدى جانداربەك بەكشين. 

الماتىنىڭ باس سانيتارلىق دارىگەرى ءۇندى شتامىن جۇقتىرعان ايەل مەن ونىڭ بالاسىنىڭ جاعدايى تۋرالى دا ايتتى. ايەلدىڭ ايتۋىنشا، ءىرى قۇرىلىس دۇكەندەرىنە بارعان كورىنەدى، ينفەكسيانى سول جەردە جۇقتىرۋى مۇمكىن.

«انا مەن بالانىڭ جاعدايى قالىپتى. ولار اۋرۋحانادان شىعارىلدى جانە دارىگەرلەردىڭ باقىلاۋىندا»، – دەدى جۋرناليستەرگە جانداربەك  بەكشين. 

الماتى ەپيدەميولوگتارى كوروناۆيرۋس ينفەكسياسىن جۇقتىرۋدىڭ ەڭ ىقتيمال ورىندارىن انىقتادى. مىسالى، وتباسىلىق شارالار، تويلار، مەرەيتويلار، ەسكە الۋ كەشتەرى 1،7%-دى قۇرايدى. سونداي-اق تۇنگى كلۋبتارعا كەلۋشىلەر، كاراوكە ورىندارى 0،2%-عا وسكەنىن ايتتى. ال ASHYQ جوباسىنا قاتىساتىن نىسانداردا ينفەكسيا جاعدايلارى تىركەلمەگەن.

 بۇل رەتتە وتباسىلاردا جۇقتىرۋدىڭ ۇلەس سالماعى – 25%، ساۋدا نىساندارىندا – 23%، قوعامدىق كولىكتە قاتىناۋ – 16،7%، بۇقارالىق ءىس-شارالارعا قاتىسۋ كەزىندە – 6% قۇرايدى. 

سانيتارلىق دارىگەرلەر مەن ەپيدەميولوگتار «دەلتا» شتامىنىڭ بالالار مەن جاستارعا ناقتى اسەرىن ايتتى. وتكەن اپتادا 14 جاسقا دەيىنگى بالالار اراسىندا اۋرۋ 2،3%-عا ءوستى. 

جانداربەك  بەكشين مەگاپوليس تۇرعىندارى مەن قوناقتارىنا دەمالىس كۇندەرى بۇقارالىق ءىس-شارالارعا، سالتاناتتارعا، كلۋبتارعا بارۋدان باس تارتۋعا، سانيتارلىق نورمالاردى ساقتاۋعا شاقىردى.