الماتىدا تۇركى مەملەكەتتەرى ۇيىمىنىڭ IV حالىقارالىق جاستار فەستيۆالىنىڭ سالتاناتتى اشىلۋ ءراسىمى ءوتتى. ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا، تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋرالييەۆ جانە الماتى قالاسىنىڭ اكىمى دارحان ساتىبالدى قاتىستى.
سالتاناتتى جيىنعا جينالعانداردى قۇتتىقتاعان مادەنيەت جانە اقپارات ءمينيسترى مەملەكەت باسشىسى قاسىم-جومارت توقايەۆتىڭ اتىنان جولدانعان قۇتتىقتاۋ جەدەلحاتىن وقىپ بەردى.
«الماتى - ازاتتىعىمىزدىڭ التىن بەسىگى، جاسامپاز جاستاردىڭ قۇتتى مەكەنى. وركەنيەتىمىزدىڭ ءورىسىن كەڭەيتۋگە ولشەۋسىز ۇلەس قوسقان كوپتەگەن ۇلى تۇلعالارىمىز وسى قالادا وسىپ-ونگەن. شىن مانىندە، ءتول مادەنيەتىمىزدىڭ تەمىرقازىعىنا اينالعان شەجىرەلى شاھار قازاق ەلىنىڭ عانا ەمەس، تۇركى مەملەكەتتەرىنىڭ دە رۋحاني ورداسى سانالادى»، - دەلىنگەن جەدەلحاتتا.
پرەزيدەنت سونداي-اق، الماتىعا «2025 جىل – تۇركى الەمىنىڭ جاستار استاناسى» مارتەبەسىنىڭ بەرىلۋىمەن بارشانى قۇتتىقتاعان.
ءىس-شارا بارىسىندا الماتىعا رەسمي تۇردە «2025 جىلى – تۇركى الەمىنىڭ جاستار استاناسى» مارتەبەسى بەرىلدى. بۇل جاستار ساياساتىن دامىتۋداعى قالانىڭ بەلسەندى ءرولىن ايقىنداپ، تۇركى دۇنيەسى ەلدەرى اراسىنداعى ىنتىماقتاستىقتى نىعايتۋدىڭ جاڭا كەزەڭىنە جول اشتى. بۇعان دەيىن بۇل اتاق ازەربايجاننىڭ لەنكوران قالاسىنا بەرىلگەن ەدى.
اباي الاڭىنداعى سالتاناتتى ءراسىم قازاقستاندىق ەسترادا جۇلدىزدارى مەن شىعارماشىلىق ۇجىمداردىڭ قاتىسۋىمەن وتكەن كونسەرتتىك باعدارلاماعا ۇلاستى. مەرەكەلىك شوۋ تۇركى مەملەكەتتەرى جاستارىنىڭ دوستىعى مەن بىرلىگىنىڭ نىشانىنا اينالدى.
جىل بويى الماتىدا حالىقارالىق جاستار كەمپينگى، «Digital Turkic Youth» فورۋمى، «جايدارمان fest» فەستيۆالى جانە ەكولوگيا، مادەنيەت پەن جاستار باستامالارىنا ارنالعان باسقا دا جوبالار ۇيىمداستىرىلادى. بۇل ءىس-شارالار تۇركى دۇنيەسى جاستارىنىڭ بىرلىگى مەن شىعارماشىلىعىنىڭ، جاسامپازدىعىنىڭ ايقىن كورىنىسى بولماق.