الماتىدا ەرەكشە قاجەتتىلىگى بار ادامدار ءۇشىن ينفراقۇرىلىمنىڭ قولجەتىمدىلىگىن ارتتىرۋ جانە ينكليۋزيۆتى تۋريستىك ورتانى دامىتۋ ماقساتىندا قالانىڭ كورىكتى ورىندارىنىڭ بەس تاكتيلدى ۇلگىسىن دايىنداۋ جۇمىستارى اياقتالدى.
تاكتيلدى ۇلگىلەر كەلەسى نىساندار ءۇشىن جاسالدى: ۆوزنەسەنسك شىركەۋى، ىقىلاس اتىنداعى حالىق مۋزىكالىق اسپاپتار مۋزەيى، اباي اتىنداعى قازاق ۇلتتىق وپەرا جانە بالەت تەاترى، الماتى مۋزەيى جانە قازاقستان رەسپۋبليكاسىنىڭ ۇلتتىق عىلىم اكادەمياسى.
جوبا ينكليۋزيۆتى ورتاعا بەيىمدەلگەن شاعىن ساۋلەت نىساندارى تۇجىرىمداماسى اياسىندا جۇزەگە اسىرىلدى. قولمەن سەزىپ تانۋعا ارنالعان ۇلگىلەر كورۋ قابىلەتى بۇزىلعان تۋريستەرگە جانە وزگە دە ەرەكشە قاجەتتىلىگى بار ادامدارعا قالانىڭ كورىكتى ورىندارىنىڭ سىرتقى بەينەسىن سەزىنۋ ارقىلى قابىلداۋعا مۇمكىندىك بەرەدى. سونىمەن قاتار كونسترۋكسيالار قالانىڭ مادەني مۇراسىنا ۇقىپتى قاراۋ قاعيداتتارىن ەسكەرە وتىرىپ جوبالانعان.
شاعىن ساۋلەت نىساندارىنىڭ ۇشەۋى عيماراتتاردىڭ كىرەبەرىس ايماقتارىندا، ال ەكەۋى عيماراتتاردىڭ ىشىنە ورنالاستىرىلدى. قۇرىلىمدار نىسانداردىڭ ساۋلەتتىك ستيلىنە ساي بەزەندىرىلگەن ۇستەلشە فورماتىندا جاسالعان. بەتكى بولىگىندە زاماناۋي 3D-باسىپ شىعارۋ تەحنولوگيالارى قولدانىلىپ دايىندالعان كولەمدى 3D-مودەل ورنالاستىرىلعان. بارلىق ەلەمەنت انتيۆاندالدىق سيپاتقا يە جانە ءارتۇرلى كليماتتىق جاعدايدا پايدالانۋعا بەيىمدەلگەن.
سەزىنۋگە ارنالعان ۇلگىلەر ۇزاق مەرزىمدى پايدالانۋعا ەسەپتەلگەن جانە ولار ەرەكشە قاجەتتىلىگى بار كەلۋشىلەرگە بارىنشا ۇزاق قىزمەت ەتۋى ءۇشىن قالا تۇرعىندارى مەن قوناقتارىنىڭ ۇقىپتى قاراۋىن تالاپ ەتەدى.
جوبانى ىسكە اسىرۋ الماتىدا قولجەتىمدى تۋريستىك ورتانى قالىپتاستىرۋعا، قالا تۇرعىندارى مەن قوناقتارى ءۇشىن جايلىلىق دەڭگەيىن ارتتىرۋعا، سونداي-اق ينكليۋزيۆتى ءتۋريزمدى دامىتۋعا باعىتتالعان.
بۇعان دەيىن Mastercard كومپانياسىنىڭ دەرەكتەرىنە سايكەس، شەتەلدىك تۋريستەر قالاداعى ءارتۇرلى ورىنعا جوعارى قىزىعۋشىلىق تانىتىپ وتىرعانى حابارلانعان بولاتىن. تانىمال نىساندار قاتارىندا كوكتوبە، ۆوزنەسەنسك شىركەۋى، ورتالىق مەملەكەتتىك مۋزەي، كوك بازار جانە ىقىلاس اتىنداعى حالىق مۋزىكالىق اسپاپتار مۋزەيى بار.
قولمەن سەزىپ تانۋعا ارنالعان ۇلگىلەر ەرەكشە قاجەتتىلىگى بار كەلۋشىلەرگە اتالعان نىساندارمەن تەرەڭىرەك تانىسۋعا مۇمكىندىك بەرەدى. بۇل مادەني جانە تانىمدىق ءتۋريزمنىڭ اياسىن كەڭەيتىپ، قالانىڭ تاريحي-مادەني مۇراسىنا قۇرمەتپەن قاراۋ مادەنيەتىن قالىپتاستىرۋعا ىقپال ەتەدى.