الماتىدا 2025 جىلعى قۇرىلىس ماۋسىمىنىڭ قورىتىندىسى بويىنشا ينجەنەرلىك-كوممۋنيكاسيالىق ينفراقۇرىلىم جوبالارىن جۇزەگە اسىرۋ كەزىندە زاڭبۇزۋشىلىقتارعا جول بەرگەن ءبىرقاتار مەردىگەر ۇيىمنى ليسەنزياسى الىندى. بۇل تۋرالى الماتى قالاسى اكىمىنىڭ ورىنباسارى الماسحان سماتلايەۆ الماتىندا وتكەن بريفينگ بارىسىندا مالىمدەدى.
ونىڭ ايتۋىنشا، ليسەنزيا جۇمىس كەزىندە تالاپتاردىڭ جۇيەلى تۇردە بۇزىلۋىنا جول بەرگەن كومپانيالاردان الىندى. ولاردىڭ قاتارىندا «AsiaMax» ج ش س، «سك 7 ستروي» ج ش س، «ەنەردجي-تاراز» ج ش س، «الاتاۋ ساپا قۇرىلىس» ج ش س بار.
«جۇيەلى تەكسەرىستەر مەن جوسپاردان تىس باقىلاۋلار ناتيجەسىندە ساپا مەن نورماتيۆتىك تالاپتاردىڭ ساقتالۋىن قامتاماسىز ەتپەيتىن كومپانيالاردىڭ قالا جوبالارىندا جۇمىس ىستەۋگە قۇقىعى جوق دەگەن قاتاڭ شەشىم قابىلداندى»، — دەدى سپيكەر.
الماسحان سماتلايەۆتىڭ ايتۋىنشا، جاۋاپسىز مەردىگەرلەرگە قاتىستى 30 تالاپ-ارىز دايىندالىپ، سوت ورىندارىنا جولدانعان. سونىمەن قاتار، جوبالاۋ ۇيىمدارى مەن اۆتورلىق قاداعالاۋ ورگاندارىنا قاتىستى دا تالاپ-ارىز جۇمىستارى جۇرگىزىلۋدە، ونىڭ ىشىندە ينجەنەرلىك جەلىلەر مەن اباتتاندىرۋ ەلەمەنتتەرىندە جوبالىق شەشىمدەردىڭ دۇرىس ورنالاسپاۋ فاكتىلەرى بار.
اكىم ورىنباسارى انىقتالعان زاڭبۇزۋشىلىقتارعا بايلانىستى جۇمىستاردى كەلىسۋ ءتارتىبى وزگەرتىلگەنىن اتاپ ءوتتى.
«ەندىگى كەزەكتە بارلىق كەلىسىم تەك قالانىڭ باسقارمالارىنىڭ قاتىسۋىمەن جۇرگىزىلەدى. بۇل باقىلاۋدى كۇشەيتىپ، بارلىق قاتىسۋشىلاردىڭ جاۋاپكەرشىلىگىن ارتتىرادى»، — دەدى الماسحان سماتلايەۆ.
سونداي-اق سپيكەر مەردىگەر جانە جوبالىق ۇيىمدارعا نورماتيۆتىك تالاپتاردى، جۇمىس جۇرگىزۋ ەرەجەلەرىن جانە كەلىسۋ راسىمدەرىن مۇلتىكسىز ساقتاۋدىڭ ماڭىزىن ەسكەرتتى. ءتيىستى رۇقساتسىز نەمەسە بەلگىلەنگەن نورمالاردى بۇزا وتىرىپ جۇرگىزىلگەن جۇمىستار قاتاڭ اكىمشىلىك شارالار ارقىلى توقتاتىلادى.
«بۇل ايىپپۇلدار، قىزمەتتى توقتاتۋ، كەلتىرىلگەن شىعىندى وتەۋ، كەلىسىم-شارتتاردى بۇزۋ جانە ليسەنزيادان ايىرۋعا دەيىن جەتۋى مۇمكىن»، — دەدى اكىمنىڭ ورىنباسارى.
الماسحان سماتلايەۆتىڭ ايتۋىنشا، قولدانىلاتىن شارالار 2026 جىلى جوسپارلانعان قالالىق جوبالاردى ساپالى ءارى مەرزىمىندە جۇزەگە اسىرا الاتىن مىقتى ءارى سەنىمدى مەردىگەرلەر توبىن قالىپتاستىرۋعا باعىتتالعان.