الماتى قالاسىندا كامەلەتكە تولماعاندار اراسىنداعى قۇقىق بۇزۋشىلىقتاردىڭ، باقىلاۋسىز قالۋ جاعدايلارىنىڭ الدىن الۋ جانە اتا-انالار مەن بالالاردىڭ قۇقىقتىق ساۋاتتىلىعىن ارتتىرۋ ماقساتىندا "ءجاسوسپىرىم" جەدەل-پروفيلاكتيكالىق ءىس-شاراسى جالعاسىپ جاتىر.
اتالعان ءىس-شارا اياسىندا مەدەۋ اۋدانى اكىمدىگى جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ وتىرىسى ءوتتى. جيىندا اتا-انالىق مىندەتتەرىن ۇنەمى ورىنداماي كەلە جاتقان 40 جاستاعى جەرگىلىكتى تۇرعىنعا قاتىستى ءىس قارالدى. تالقىلاۋ ناتيجەسىندە بۇل ماسەلەگە قاتىستى ماتەريالداردى اتا-انا قۇقىقتارىن شەكتەۋ ماقساتىندا كامەلەتكە تولماعانداردىڭ ىستەرى جونىندەگى اۋدانارالىق سوتقا جولداۋ تۋرالى شەشىم قابىلداندى. سونىمەن قاتار ساباققا ۇنەمى قاتىسپايتىن كامەلەتكە تولماعان ءجاسوسپىرىمنىڭ ءىسى قارالدى. كوميسسيا بالانى ديەۆيانتتى مىنەز-قۇلىقتى بالالارعا ارنالعان ارنايى ءبىلىم بەرۋ ۇيىمىنا ورنالاستىرۋ جونىندە ماتەريالداردى سوتقا جولداۋعا شەشىم شىعاردى.
– مۇنداي شەشىمدەر تەك ەرەكشە جاعدايلاردا، باسقا الدىن الۋ شارالارى ناتيجە بەرمەگەن جاعدايدا عانا قابىلدانادى. ءبىزدىڭ ماقسات – جازالاۋ ەمەس، ءجاسوسپىرىمنىڭ ومىرىنە ءقاۋىپ تونگەن ساتتە ۋاقىتىلى ارالاسۋ. وكىنىشكە قاراي، كوپ جاعدايدا بالالاردىڭ قيىن جاعدايعا تاپ بولۋىنا ەرەسەكتەردىڭ نەمقۇرايلىعى سەبەپ بولىپ وتىر. بيىل – الدىن الۋ جىلى. وسىعان وراي، اتا-انالارعا ەرەكشە جاۋاپكەرشىلىك جۇكتەلەدى. بالا تاربيەسى – وتباسىنان باستالادى، ۇلكەندەر ۇلگى بولۋى ءتيىس، – دەدى كوميسسيا وتىرىسىندا ءىلياس ومىرسەرىكوۆ.
قازىرگى تاڭدا قالانىڭ بارلىق اۋداندارىندا پروفيلاكتيكالىق شارالار بەلسەندى تۇردە جالعاسۋدا. پوليسيا قىزمەتكەرلەرى اتا-انالار مەن زاڭدى وكىلدەردى بالالاردىڭ جاعدايىنا بەي-جاي قاراماۋعا، مەكتەپ پەن پروفيلاكتيكالىق ورگاندارمەن تىعىز بايلانىستا بولۋعا شاقىرۋدا.