دوستىق ۇيىندە قازاقستان حالقى اسسامبلەياسىنىڭ 30 جىلدىعىنا ارنالعان «قازاقستان – بەيبىتشىلىك پەن بىرلىكتىڭ كەپىلى» اتتى ەتنومادەني بىرلەستىكتەردىڭ رەسپۋبليكالىق كونفەرەنسياسى ءوتتى. قاتىسۋشىلار اسسامبلەيانىڭ وتىز جىلداعى جەتىستىكتەرىن، ەتنوسارالىق كەلىسىم مەن ۇلتتىق بىرلىكتى نىعايتۋ تاجىريبەسىن، سونداي-اق 2026 جىلعا ارنالعان جوسپارلاردى تالقىلادى.
ءىس-شاراعا ەتنومادەني بىرلەستىكتەردىڭ، ۇكىمەتتىك ەمەس ۇيىمداردىڭ جانە مەگاپوليستەگى قحا قۇرىلىمدارىنىڭ وكىلدەرىمەن قاتار الماتى قالاسى اكىمىنىڭ ورىنباسارى ابزال نۇكەنوۆ، قحا ءتوراعاسىنىڭ ورىنباسارى مارات ءازيلحانوۆ جانە قالا ىشكى ساياسات باسقارماسىنىڭ باسشىسى ايدار ەسەنبەكوۆ قاتىستى.
الماتى قالاسى اكىمىنىڭ ورىنباسارى ابزال نۇكەنوۆ ءوز سوزىندە قحا-نىڭ وڭ ءرولىن جانە قازاقستاندىق كەلىسىم مودەلىنىڭ بىرەگەيلىگىن اتاپ ءوتتى.
– تاۋەلسىزدىك تۋرالى ايتقاندا، ەڭ الدىمەن بىرلىكتى ايتامىز. بىرلىك بولماسا، تاۋەلسىزدىك تە بولمايدى. قازاقستاندىق بىرلىكتىڭ نەگىزگى تىرەك تەتىكتەرىنىڭ ءبىرى – اسسامبلەيا. قحا – مەملەكەت پەن قوعاممەن ۇيلەسىمدى جۇمىس ىستەيتىن بىرەگەي ينستيتۋت. ءبىز بارلىق ەتنومادەني بىرلەستىكتەردىڭ ۇلەسىن جوعارى باعالايمىز جانە جوبالارىن جۇزەگە اسىرۋدا تابىس تىلەيمىز، – دەدى ابزال نۇكەنوۆ.
قازاقستان حالقى اسسامبلەياسى ءتوراعاسىنىڭ ورىنباسارى، ق ر پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى مارات ءازيلحانوۆ ۇيىمنىڭ 30 جىلدىعى ەل ءۇشىن تاريحي وقيعا بولعانىن اتاپ ءوتتى. سونداي-اق ول اسسامبلەيانىڭ ميسسياسى – قوعامنىڭ بىرلىگىن قامتاماسىز ەتۋ جانە بارلىق قۇرىلىمدار مەن بىرلەستىكتەر ءۇشىن ۇلگى بولۋ ەكەنىن ەسكە سالدى.
– اسسامبلەيا – ساياسي پارتيالار، كاسىپوداقتار مەن قوعامدىق ۇيىمداردىڭ جۇمىسى قۇرىلاتىن نەگىز. ءبىزدىڭ ماقساتىمىز – مەملەكەت ينستيتۋتتارىنىڭ بارلىعىمەن بىرلەسە وتىرىپ، بىرلىكتى ساقتاۋ، – دەپ قوستى سپيكەر.
كونفەرەنسيا تاجىريبە الماسۋ، وزەكتى ماسەلەلەردى تالقىلاۋ جانە قازاقستان حالقى اسسامبلەياسىنىڭ حالىقتىق ديپلوماتيا ينستيتۋتى رەتىندەگى ءرولىن نىعايتۋ ءۇشىن ماڭىزدى الاڭعا اينالدى. قاتىسۋشىلار بىرلىك، دوستىق جانە مادەني ءارالۋاندىق قۇندىلىقتارىن ىلگەرىلەتۋ جۇمىسى كەلەسى جىلى دا جاڭا جوبالار مەن باستامالار ارقىلى جالعاساتىنىن اتاپ ءوتتى.