الماتى قالاسىنىڭ اكىمى دارحان ساتىبالدى ۋربانيستيكا ورتالىعىنىڭ ۇجىمىمەن اباتتاندىرۋعا جانە جايلى قالالىق كەڭىستىكتەر قۇرۋعا جۇيەلى تاسىلدەردى ازىرلەۋ جانە ەنگىزۋ ماسەلەلەرى بويىنشا كەڭەس وتكىزدى. ۋربانيستيكا ورتالىعى اعىمداعى جىلدىڭ شىلدە ايىندا الماتى دامۋ ورتالىعىنىڭ بازاسىندا ساۋلەت، لاندشافتىق ديزاين جانە كوگالداندىرۋ سالاسىنداعى ساراپشىلاردى بىرىكتىرە وتىرىپ قۇرىلعان بولاتىن.
كەڭەس بارىسىندا ۋربانيستيكا ورتالىعىنىڭ وكىلدەرى قالالىق ورتانى جاڭعىرتۋعا قاتىستى جۇرگىزىلىپ جاتقان جۇمىستار مەن نەگىزگى جوبالار تۋرالى ايتىپ بەردى.
ورتالىقتىڭ نەگىزگى مىندەتتەرى-قالانىڭ سىرتقى كەلبەتىن جاقسارتۋ ءۇشىن ءبىرىڭعاي ءستيلدى قالىپتاستىرۋ، جايلى قوعامدىق كەڭىستىكتەردى اباتتاندىرۋ بويىنشا جوبالاردى ازىرلەۋ جانە كوگالداندىرۋعا وزىق تاسىلدەردى ەنگىزۋ.
بۇگىنگى تاڭدا ۋربانيستيكا ورتالىعى جاسىل جەلەكتەردى كۇتىپ ۇستاۋ مەن قورعاۋدىڭ قولدانىستاعى ەرەجەلەرىن كۇشەيتۋگە ارنالعان كوگالداندىرۋ جارعىسىن ازىرلەۋدە. قۇجات وتىرعىزاتىن ماتەريالداردى ستاندارتتاۋدى، ونىڭ اسسورتيمەنتىن جانە كۇتىپ-باپتاۋ ساپاسىن، اعاش بيىكتىگىنە، تامىردىڭ ديامەترىنە جانە كۇتىم ستاندارتتارىنا قويىلاتىن تالاپتاردى ارتتىرۋدى كوزدەيدى.
بۇدان وزگە، كوشەلەر مەن رەكرەاسيالىق ايماقتاردى جوبالاۋ جونىندەگى نۇسقاۋلىقتى، سونداي-اق ماتەريالداردىڭ ساپاسىنا قويىلاتىن ءبىرىڭعاي تالاپتاردى قامتيتىن اباتتاندىرۋ قاعيدالارىنىڭ جيناعىن قۇرۋ بويىنشا جۇمىس جۇرگىزىلۋدە.
قالا باسشىسى دارحان ساتىبالدى جوبالاردى ىسكە اسىرۋدىڭ بارلىق كەزەڭدەرىندە جۇيەلى ءتاسىل مەن ساپانى باقىلاۋ باسىمدىق بولىپ تابىلاتىنىن اتاپ ءوتتى.
«باسقارمالار مەن اۋدان اكىمدىكتەرى جوبالاردى ىسكە اسىرۋ كەزىندە باتتاندىرۋ مەن كوگالداندىرۋدىڭ ءبىرىڭعاي ەرەجەلەرىن قاتاڭ ساقتاۋى ءتيىس. ۋربانيستيكا ورتالىعى اۆتورلىق مونيتورينگ فۋنكسيالارىن ورىندايدى جانە قوعامدىق كەڭىستىكتەردى دامىتۋ باسقارماسىمەن بىرلەسىپ اباتتاندىرۋ تۇجىرىمدامالارىن ازىرلەۋگە قاتىسادى»، - دەدى دارحان ساتىبالدى.