الەۋمەتتىك جەلىلەردە بىرنەشە كولىك جۇرگىزۋشىسى تاراپىنان جول ءجۇرۋ ەرەجەلەرىنىڭ ورەسكەل بۇزىلعانى تۇسىرىلگەن بەينەجازبا تارادى.
كادرلاردا قاراما-قارسى جولاقپەن ءجۇرۋ، ارتقا قوزعالۋ، اگرەسسيۆتى جۇرگىزۋ جانە باسقا دا ءقاۋىپتى مانيەۆرلەر جاسالعان. اتالعان دەرەك بويىنشا جەرگىلىكتى پوليسيا قىزمەتىمەن تەكسەرۋ جۇرگىزىلىپ، جۇرگىزۋشىلەر انىقتالدى، دەپ حابارلايدى aqshamnews.kz.
بارلىق كولىك ارنايى ايىپپۇل تۇراعىنا قويىلدى. جول قوزعالىسىنىڭ باسقا قاتىسۋشىلارىنا ءقاۋىپ ءتوندىرىپ، اۆتوكولىكتى ارتقا قاراي جۇرگىزگەن جۇرگىزۋشىلەردىڭ ءبىرى سوت شەشىمىمەن 10 تاۋلىككە اكىمشىلىك قاماۋعا الىندى. جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ جول ەرەجەسىن ەلەمەۋ اۋىر سالدارعا الىپ كەلۋى مۇمكىن ەكەنىن اتاپ ءوتتى.
— جول — بەيقامدىقتى كەشىرمەيدى، ال جول ءجۇرۋ ەرەجەلەرىن ادەيى ەلەمەۋ جازاسىز قالمايدى. جولداعى قاۋىپسىزدىك — بارلىعىمىزدىڭ ورتاق جاۋاپكەرشىلىگىمىز. ءاربىر جۇرگىزۋشى تاۋەكەلگە تولى مانيەۆرلەر بىرەۋدىڭ ءومىرىن جالماۋى مۇمكىن ەكەنىن ەستە ۇستاۋى قاجەت، – دەدى، سەرىك شۋمايەۆ.
پوليسيا جول قوزعالىسى ەرەجەلەرىن ساقتاۋعا جانە جولدا باسقا قاتىسۋشىلارعا قۇرمەتپەن قاراۋعا شاقىرادى.