الماتى قالاسىنىڭ اكىمدىگىندە «GITEX Central Asia/Kazakhstan 2026» حالىقارالىق فورۋمىن وتكىزۋ تۋرالى ۇسىنىستى قاراۋعا ارنالعان كەڭەس ءوتتى. تالقىلاۋعا قالانىڭ سيفرلاندىرۋ باسقارماسىنىڭ وكىلدەرى مەن Dubai World Trade Centre (DWTC) كومپانياسىنىڭ ءىس-شارالاردى باسقارۋ جونىندەگى ۆيسە-پرەزيدەنتى تريكسي لوميرماند قاتىستى.
فورۋمدى 2026 جىلى 2-4 ماۋسىم ارالىعىندا «اتاكەنت» كورمە ورتالىعىنىڭ اۋماعىندا وتكىزۋ جوسپارلانىپ وتىر. ءىس-شارانىڭ باستاماشىسى – DWTCء-تىڭ ەنشىلەس كومپانياسى جانە 1981 جىلدان بەرى جىل سايىن دۋبايدا وتەتىن الەمدەگى ەڭ ءىرى تەحنولوگيالىق كورمە GITEX GLOBAL-دىڭ ۇيىمداستىرۋشىسى Kaoun International كومپانياسى.
بۇل باستامانى جۇزەگە اسىرۋ قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ «جاساندى ينتەللەكت داۋىرىندەگى قازاقستان: وزەكتى مىندەتتەر جانە ولاردى سيفرلىق ترانسفورماسيا ارقىلى شەشۋ» اتتى حالىققا جولداۋىندا ايقىندالعان مىندەتتەرگە ساي كەلەدى. مەملەكەت باسشىسى جولداۋىندا قازاقستاننىڭ باستى ماقساتى – ەۋرازيانىڭ سيفرلىق حابىنا اينالۋ ەكەنىن اتاپ، ءبىرىڭعاي ۇلتتىق سيفرلىق ەكوجۇيەنى قالىپتاستىرۋ مەن زاماناۋي ىت-شەشىمدەردى ەكونوميكاعا ەنگىزۋدى جەدەلدەتۋدى تاپسىرعان بولاتىن.
الماتىدا GITEX Central Asia فورۋمىن وتكىزۋ – وسى ستراتەگيالىق ماقساتتاردى جۇزەگە اسىرۋ جولىنداعى ماڭىزدى قادام بولماق. بۇل شارا ەلىمىزگە الەمدىك دەڭگەيدەگى تەحنولوگيالىق كومپانيالاردى تارتۋعا، سونداي-اق يننوۆاسيالار سالاسىنا ينۆەستيسيا تارتۋعا مۇمكىندىك بەرەدى.
GITEX فورۋمى 105 ەلدەن كەلگەن 6،8 مىڭنان استام كومپانيانى بىرىكتىرىپ، تاجىريبە الماسۋ مەن ستراتەگيالىق سەرىكتەستىكتەر ورناتۋدىڭ جەتەكشى الاڭى. فورۋمنىڭ الماتىدا ءوتۋى ورتالىق ازيا ەلدەرىنىڭ جاھاندىق تەحنولوگيالىق كەڭىستىككە ىقپالداسۋىنا جانە حالىقارالىق ىنتىماقتاستىقتى نىعايتۋعا جول اشادى.
GITEX Central Asia 2026 باعدارلاماسىنا پانەلدىك سەسسيالار، يننوۆاسيالار كورمەسى، ينۆەستورلارمەن كەزدەسۋلەر ءوتىپ، وتاندىق ىت-شەشىمدەر تانىستىرىلادى. قازىرگى تاڭدا فورۋمدى جوعارى حالىقارالىق دەڭگەيدە وتكىزۋ ءۇشىن ۇيىمداستىرۋشىلىق جانە تەحنيكالىق جايتتار ەگجەي-تەگجەيلى پىسىقتالىپ جاتىر. ءىس-شارانى جوعارى حالىقارالىق دەڭگەيدە وتكىزۋ ءۇشىن الەۋەتتى الاڭدار مەن قاجەتتى ينفراقۇرىلىمدىق شەشىمدەر قاراستىرىلىپ جاتىر.