الماتى قالاسىنىڭ 2025 جىلعا ارنالعان بيۋدجەتىن قورىتىندى ناقتىلاۋ جوباسى ءماسليحات دەپۋتاتتارىنىڭ قاراۋىنا ۇسىنىلدى. بۇل تۋرالى ەكونوميكا جانە قارجى باسقارماسىنىڭ باسشىسى باۋىرجان قۇدايبەرگەنوۆ قالا ءماسليحاتىنىڭ سەسسياسىندا باياندادى.
ونىڭ ايتۋىنشا، بۇل ناقتىلاۋ – جىل سوڭىنداعى نەگىزگى قارجىلىق پارامەترلەردى وڭتايلاندىرۋعا جانە بولىنگەن قاراجاتتىڭ ءتيىمدى يگەرىلۋىن قامتاماسىز ەتۋگە باعىتتالعان تۇزەتۋلەردىڭ سوڭعى كەزەڭى. بيۋدجەتتىك باعدارلامالاردىڭ بارلىق شىعىس بولىكتەرى سالالىق كوميسسيالاردا جان-جاقتى تالقىلانعان.
ۇنەمدەلگەن قارجى جانە قايتا ءبولۋ
مەملەكەتتىك ساتىپ الۋلار ناتيجەسىندە 19،5 ملرد تەڭگە كولەمىندە ۇنەمدەلگەن قاراجات قالىپتاسقان. سونىمەن قاتار، ءبىرقاتار جوبالاردىڭ كەزەڭ-كەزەڭىمەن ىسكە اسىرىلۋىنا جانە كەيبىر ءىس-شارالاردىڭ كەلەسى جىلعا شەگەرىلۋىنە بايلانىستى 200 ملرد تەڭگەنى قايتا ءبولۋ جوسپارلانىپ وتىر.
باسقارما باسشىسى بۇل جالپى شىعىنداردى قىسقارتۋ ەمەس ەكەنىن اتاپ ءوتتى. قارجىلاندىرۋ تەك ورىندالعان جۇمىستاردىڭ راستالعان اكتىلەرى نەگىزىندە جۇرگىزىلەدى، بۇل بيۋدجەت قارجىسىن نەعۇرلىم ءتيىمدى ءارى ماقساتتى پايدالانۋعا مۇمكىندىك بەرەدى.
قوسىمشا قارجىلاندىرۋدى قاجەت ەتەتىن باعىتتار
جۇمىس كەستەسىنەن وزا وتىرىپ جۇزەگە اسىرىلعان جوبالار بويىنشا مىندەتتەمەلەردى ۋاقتىلى ورىنداۋ ءۇشىن 73،4 ملرد تەڭگە كولەمىندە قوسىمشا قارجىلاندىرۋ قاجەتتىلىگى تۋىنداپ وتىر.
پرەمەر-مينيستردىڭ تۇراقتاندىرۋ قورلارىن ۇلعايتۋ جانە الەۋمەتتىك ماڭىزى بار ازىق-تۇلىك تاۋارلارىنىڭ تىزبەسىن كەڭەيتۋ جونىندەگى تاپسىرماسىنا سايكەس، باعانى تۇراقتاندىرۋمەن اينالىساتىن ۇيىمداردى كرەديتتەۋگە جەرگىلىكتى بيۋدجەتتەن 8 ملرد تەڭگە ءبولۋ ۇسىنىلدى. بۇل شارالار ازىق-تۇلىك قاۋىپسىزدىگىن نىعايتۋعا، ينفلياسيانى تومەندەتۋگە جانە باعالاردىڭ قولجەتىمدىلىگىن قامتاماسىز ەتۋگە باعىتتالعان.
الەۋمەتتىك جانە ينفراقۇرىلىمدىق جوبالار
"قۇرامىس" شاعىناۋدانىندا سالىنىپ جاتقان ەمحانانىڭ قۇرىلىسىن جالعاستىرۋ ءۇشىن 700 ملن تەڭگە قاراستىرۋ جوسپارلانعان. بۇل نىساندى 2026 جىلعى تامىز ايىندا ۋاقىتىندا پايدالانۋعا بەرۋگە مۇمكىندىك بەرەدى.
سونىمەن قاتار "راحات-مادەنيەت" جانە "بورالداي" شاعىناۋداندارىنداعى جول قۇرىلىسىن جالعاستىرۋ ماقساتىندا 1،8 ملرد تەڭگە ءبولۋ كوزدەلىپ وتىر.
قالاىشىلىك باعىتتار بويىنشا جولاۋشىلار تاسىمالىن سۋبسيديالاۋ ءۇشىن 10 ملرد تەڭگە ءبولۋ ۇسىنىلدى. بۇل تۇرعىندار ءۇشىن قوعامدىق كولىك قىزمەتتەرىنىڭ قولجەتىمدىلىگىن قامتاماسىز ەتۋگە باعىتتالعان.