الماتىداعى رەسپۋبليكا سارايىندا مادەنيەت جانە ونەر قىزمەتكەرلەرى كۇنىنە ارنالعان سالتاناتتى شارا ءوتتى.
شارا اياسىندا ۇلت رۋحانياتىن ورگە سۇيرەپ، شاھاردىڭ مادەني ومىرىنە ەلەۋلى ۇلەس قوسىپ جۇرگەن سالا مايتالماندارى ماراپاتتالدى.
سۋرەتشىلەر، ديزاينەرلەر، ارتىستەر، سيرك جانە مۋزەي قىزمەتكەرلەرى، كىتاپحاناشىلار سىندى ءتۇرلى باعىتتاعى مادەنيەت جاناشىرلارى مەملەكەتتىك جانە ۆەدومستۆولىق ناگرادالارعا يە بولدى.
سالتاناتتى جيىنعا الماتى قالاسى اكىمىنىڭ ورىنباسارى اسەم ءنۇسىپوۆا قاتىسىپ، مادەنيەت سالاسىنداعى تابىستى قىزمەتى ءۇشىن ماراپات يەلەرىنە قۇرمەت كورسەتتى.
قازاقستان رەسپۋبليكاسى پرەزيدەنتىنىڭ جارلىعىنا سايكەس، مادەنيەتتى دامىتۋعا قوسقان زور ۇلەسى ءۇشىن الماتى قالاسى مۋزەيلەر بىرلەستىگىنىڭ عىلىمي قىزمەتكەرى ەربولات اۋەزوۆ «پاراسات» وردەنىمەن ماراپاتتالدى.
– ءومىرىمنىڭ باسىم بولىگىن مادەنيەت سالاسىنا جانە الماتىنىڭ دامۋىنا ارنادىم. بۇگىنگى شارا مەن ءۇشىن ءبىر جاعىنان ساعىنىش بولسا، ەكىنشى جاعىنان – قۋانىش پەن جاڭعىرۋعا دەگەن سەزىم. بۇل مەن ءۇشىن ەكىنشى جاستىق شاق سەكىلدى. ەڭبەگىمدى ەلەپ، كوپ جىلعى جۇمىسىمدى باعالاعانى ءۇشىن مەملەكەت باسشىسىنا جانە قالا اكىمىنە العىس ايتامىن، – دەدى ەربولات اۋەزوۆ ماراپات الۋ ساتىندە.
«قۇرمەت» وردەنى ورتالىقتاندىرىلعان كىتاپحانا جۇيەسى فيليالىنىڭ مەڭگەرۋشىسى قۋانىش يسابەكوۆاعا، IL CANTO ۆوكالدىق كۆارتەتىنىڭ انشىلەرى – ماقسات ساماتوۆ، جىگەر ساتحانوۆ پەن بولات قاناگاتوۆقا، سونداي-اق «سازگەن سازى» ءانسامبلىنىڭ ءارتيسى ىقىلاس نۇرعالييەۆكە تابىستالدى.
ال «ەرەن ەڭبەگى ءۇشىن» مەدالىمەن «الاتاۋ» تەاترىنىڭ اكتريساسى الما امانجولوۆا، قازاق مەملەكەتتىك سيركىنىڭ اكروباتى نۇرلان الشىنبايەۆ جانە 5-studio TV Production ديرەكتورى تولقىن سادىكوۆا ماراپاتتالدى.
«قازاقستاننىڭ ەڭبەك سىڭىرگەن قايراتكەرى» اتاعى مەملەكەتتىك قۋىرشاق تەاترىنىڭ اكتريساسى كۇلجاميليا يلياسوۆاعا، كومپوزيتور ۆلاديمير پيتەرسيەۆكە، سۋرەتشى رۋستام مۋسايەۆقا جانە اكتريسا جاركىناي شالقارعا بەرىلدى.
قازاقستان رەسپۋبليكاسى پرەزيدەنتىنىڭ العىس حاتى مەن توسبەلگىسىنە اباي اتىنداعى قازاق ۇلتتىق وپەرا جانە بالەت تەاترىنىڭ ءارتيسى اياجان قۋانىشالييەۆا مەن حالىقارالىق بايقاۋلاردىڭ لاۋرەاتى ۇلبولسىن كەنجەباي قىزى يە بولدى.
«مادەنيەت سالاسىنىڭ ۇزدىگى» توسبەلگىسىمەن الماتى حايۋاناتتار باعى ديرەكتورىنىڭ ورىنباسارى اعىباي ءاجءىبايەۆ، مەملەكەتتىك قۋىرشاق تەاترىنىڭ ءارتيسى بولات مومىنجانوۆ جانە ەسترادالىق-سيمفونيالىق وركەستردىڭ مۋزىكانتتارى – ۆلاديمير دەمچەنكو، ريما احمەتوۆا، ايناش جايىلبەكوۆا-ساربۋفينا، مەيىرگۇل جالپاقوۆا، بوتاگوز قويشىبايەۆا، ۆالەريي ناسيبۋلين مەن الەكسەي تيموفەيەۆ ماراپاتتالدى.
– الماتى – مادەنيەتتىڭ باستى ورداسى. بۇل قالادا ەل ماقتانىشىنا اينالعان تۇلعالار ءومىر ءسۇرىپ، ونەرگە ادال قىزمەت ەتتى. مۇحتار اۋەزوۆ، شاكەن ايمانوۆ، شارا جيەنقۇلوۆا، روزا باعلانوۆا سىندى الىپتار ءوز ءىزى مەن مەكتەبىن قالدىردى. بۇگىندە ولاردىڭ جولىن جالعاپ، قالامىزدىڭ رۋحاني دامۋىنا ۇلەس قوسىپ جۇرگەن دارىندى ونەر يەلەرىنە شىنايى العىسىمىزدى بىلدىرەمىز، – دەدى قالا اكىمىنىڭ ورىنباسارى اسەم ءنۇسىپوۆا.
قازاقستان رەسپۋبليكاسى مادەنيەت جانە اقپارات مينيسترلىگىنىڭ قۇرمەت گراموتاسى ورتالىقتاندىرىلعان كىتاپحانا جۇيەسىنىڭ كىتاپحاناشىسى گۇلبارشىن بۋلانبايەۆا مەن ءديريجور نيكيتا بەلياكوۆقا تابىستالدى. ال الماتى حايۋاناتتار باعىنىڭ قىزمەتكەرى باعيلا يبراگيموۆا ءمينيستردىڭ العىس حاتىنا يە بولدى.
– مادەنيەت – ومىرىمىزگە ءمان مەن سۇلۋلىق سىيلايتىن، ادامزاتتىڭ دامۋىنا تۇرتكى بولاتىن رۋحاني كۇش. اسىرەسە، تەك بەلگىلى ارتىستەر عانا ەمەس، ساحنا سىرتىنداعى قىزمەتكەرلەردىڭ دە ەڭبەگى باعالانعانىنا قۋانىشتىمىن. مەن ءۇشىن قاراپايىم العىس حاتتىڭ ءوزى – زور قۇرمەت. بۇل – ەلەپ، ەسكەرىپ وتىرعانىنىڭ بەلگىسى. الماتى – راسىندا مادەني استانا، ال ونىڭ دامۋى – ءوز ىسىنە بەرىلگەن ماماندار مەن قالا باسشىلىعىنىڭ جاناشىرلىعىندا، – دەدى قازاقستاننىڭ ەڭبەك سىڭىرگەن قايراتكەرى، ەسترادا جانە وپەرا ءانشىسى تولقىن زابيروۆا.
الماتى قالاسىنىڭ اكىمى ەربولات دوسايەۆتىڭ اتىنان مادەنيەت پەن ونەرگە ۇلەس قوسىپ، تاريحي مۇرانى ساقتاۋعا اتسالىسقان ءبىرقاتار ازاماتتارعا العىس حاتتار تابىس ەتىلدى. ولاردىڭ قاتارىندا: ساگىمگۇل قارابالينا، راۋزيا تۇرسىنبەكوۆا، يگور بلاگودارنىي، باقىت ءالديبەكوۆ، تولقىن زابيروۆا، ۆەنەرا الپىسبايەۆا، اليار وتەتءىلەۋ، اسىلبەك ەڭسەپوۆ، باحتيار تايلاقبايەۆ، تاتيانا ادەلگازينوۆا، لاۋرا شۋلەنبايەۆا، باتىر جانۇزاق، مارلەن ماراتوۆ، قايرات بوتابەكوۆ، ايدا قاۋمەنوۆا، شوقان مۇراتحان، سارسەنباي قالي، ءاسيا حايرۋلينا، كاميللا لي، انارا ءابجانوۆا مەن نەللي بۋبە بار.