الماتىدا سوڭعى تاۋلىكتە شامامەن 20 ميلليمەتر جاۋىن-شاشىن ءتۇستى، بۇل قاراشا ايىنا ارنالعان ايلىق نورمانىڭ جارتىسىنا تەڭ. وسىعان بايلانىستى قالانىڭ كوممۋنالدىق قىزمەتى كولىك قوزعالىسىنىڭ قالىپتى ءجۇرۋىن جانە تۇرعىنداردىڭ قاۋىپسىزدىگىن قامتاماسىز ەتۋ ءۇشىن جۇمىسىن كۇشەيتىلگەن رەجيمدە جالعاستىرىپ جاتىر. بۇل تۋرالى قالالىق كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى حابارلادى.
كوشەلەردى قاردان تازارتۋ جۇمىستارى 4 قاراشا كۇنى ساعات 20:00-دە باستالعان. وسى ۋاقىت ىشىندە ماگيسترالدار ەكى رەت سىپىرىلىپ، جولعا كوكتايعاققا قارسى ارنايى قوسپالار سەبىلدى. اسىرەسە، كوپىرلەر مەن جولايىرىقتا، ورلەر مەن جۇرگىنشى وتكەلدەرى ءجىتى نازاردا ۇستالىپ وتىر.
اۋا تەمپەراتۋراسىنىڭ كۇرت تومەندەۋى سالدارىنان تاۋلى ايماقتاردا كەي جەرلەردە كوكتايعاق پايدا بولعان. مۇنداي تايعاق ۋچاسكەلەر «الماتى تازالىق» مەملەكەتتىك كوممۋنالدىق كاسىپورنى مەن مەردىگەر ۇيىمدار جەدەل تۇردە ارنايى قوسپا سەۋىپ جاتىر.
بۇل جۇمىسقا 900-دەن استام ارنايى تەحنيكا جانە 2500-دەن استام جۇمىسشى، ونىڭ ىشىندە كەزەكشى جانە پاترۋلدىك بريگادالار تارتىلعان. قۇم سەبەتىن ماشينالار، سىپىرعىش تەحنيكالار، تيەگىشتەر جانە قوسالقى قۇرالدار قولدانىلعان.
جولدى، تروتۋاردى جانە ايالداما ماڭىن تازارتۋ جۇمىستارى تاۋلىك بويى جالعاسىپ جاتىر. كوممۋنالدىق قىزمەت جول جايىن تۇراقتى تۇردە باقىلاپ، قاجەت بولعان جاعدايدا قوسىمشا قوسپا سەبەدى.