2024 جىلى الماتى بيۋدجەتىنە 24% وسىممەن 1 874 ملرد تەڭگە سالىق جانە تولەمدەر ءتۇستى. بۇل رەتتە تۇسىمدەردىڭ شامامەن 70% - ى شوب دامىتۋ ەسەبىنەن قامتاماسىز ەتىلگەن. بۇل تۋرالى الماتى قالاسىنىڭ قارجى باسقارماسى جەرگىلىكتى بيۋدجەتتىڭ كىرىسى قالا ەكونوميكاسىنىڭ قارقىندى ءوسۋىنىڭ ارقاسىندا ايتارلىقتاي ءوسىم كورسەتىپ وتىرعانىن اتاپ ءوتتى.
ايتا كەتەيىك، وتكەن جىلدىڭ جەلتوقسان ايىندا قالا ءماسليحاتى الماتىنىڭ 2025-2027 جىلدارعا ارنالعان بيۋدجەتىن بەكىتتى. ەلىمىزدىڭ تاريحىندا تۇڭعىش رەت الماتىنىڭ قالالىق بيۋدجەتى اعىمداعى جىلعا 2،2 ترلن تەڭگەدەن استى. بۇل 2022 جىلدىڭ باسىمەن سالىستىرعاندا 2،1 ەسە جوعارى. اۋداندار بيۋدجەتى دە ءوسۋدى كورسەتۋدە. ماسەلەن، فۋنكسيالاردى ورتالىقسىزداندىرۋدى ەسكەرە وتىرىپ، الماتىنىڭ 8 اۋدانىنىڭ بيۋدجەتى 2022 جىلعا قاراي 6 ەسە وسۋمەن 293،6 ملرد تەڭگە سوماسىندا بەكىتىلدى.
2023 جىلدىڭ باسىنان بەرى الماتى قالاسىنىڭ اكىمدىگى ءىرى ينفراقۇرىلىمدىق جوبالاردى ىسكە اسىرۋ ءۇشىن جوبالىق قۇجاتتارعا ۇلكەن دايىندىق جۇرگىزدى. ناتيجەسىندە، 2025 جىلى دامۋ بيۋدجەتى 2022 جىلعا قاراي 2،2 ەسەگە ۇلعايىپ، 458 ملرد تەڭگەگە جەتتى.
مەملەكەت باسشىسىنىڭ ازاماتتاردىڭ ءال-اۋقاتىن ۇدەمەلى ارتتىرۋ تۋرالى تاپسىرماسىنا سايكەس، الماتى بيۋدجەتى ءوزىنىڭ الەۋمەتتىك باعدارلانۋىن ساقتايدى. بۇل سالاعا 2025 جىلى 40% - دان استام نەمەسە 894،3 ملرد تەڭگە تيەسىلى.
ەسكە سالساق، قالا ەكونوميكاسىنىڭ قارقىندى دامۋىن جانە جەرگىلىكتى بيۋدجەت كىرىستەرىنىڭ ايتارلىقتاي ءوسۋىن ەسكەرە وتىرىپ، 2024 جىلعى 6 جەلتوقساندا Fitch Ratings الماتىنىڭ «ۆۆۆ+» دەڭگەيىندەگى دەربەس كرەديتتىك رەيتينگىن، «تۇراقتى» بولجامىن راستادى.