الماتىدا BRT جەلىسى تيميريازيەۆتەن رايىمبەك باتىرعا دەيىن ۇزارتىلادى
الماتىدا قوعامدىق كولىكتى ىڭعايلى ءارى قولجەتىمدى ەتۋ ماقساتىندا ۇزىندىعى 4،6 شاقىرىم بولاتىن BRT (Bus Rapid Transit) جەلىسىنىڭ قۇرىلىسى جەلتوقسان كوشەسىندە باستالادى. بۇل جاڭا جوعارى جىلدامدىقتاعى اۆتوبۋس جولاعى تيميريازيەۆ كوشەسى بويىنداعى جۇمىس ىستەپ تۇرعان BRT جەلىسىن رايىمبەك باتىر داڭعىلىندا سالىنىپ جاتقان جاڭا جەلىمەن بايلانىستىرادى.
كولىك كەپتەلىسى مەن اۆتوتۇراققا بايلانىستى تۋىنداعان جايتتى شەشۋ ءۇشىن BRT جولاعى جولدىڭ شەتىمەن سالىنادى. ياعني، سولتۇستىك باعىتتا – جولدىڭ وڭ جاعىمەن، ال وڭتۇستىك باعىتتا – سول جاعىمەن وتەدى. جەكە اۆتوكولىك قوزعالىسى ءۇشىن اباي داڭعىلىنان سولتۇستىككە قاراي ءبىرجاقتى قوزعالىس پەن جولاقتار سانى ساقتالادى.
قۇرىلىس قالاي وتەدى؟
قۇرىلىستا ەشقانداي عيماراتتى بۇزۋ جانە جولدى كەڭەيتۋ قاراستىرىلماعان. اۆتوبۋس ايالدامالارى مۇمكىندىگى شەكتەۋلى جاندار ءۇشىن قولجەتىمدىلىكتى ەسكەرە وتىرىپ، ارنايى پلاتفورمادا ورنالاستىرىلادى. جوبا اياسىندا باعدارشام نىساندارىن جاڭارتۋ، كوشە جارىعىن جەتىلدىرۋ، تروتۋارلاردى پليتكامەن قاپتاۋ ارقىلى جاياۋ جۇرگىنشىلەر بولىگىن جاڭارتۋ كوزدەلگەن.
جۇمىس 26 ساۋىردە باستالادى. العاشقى كەزەڭدە ينجەنەرلىك كوممۋنيكاسيا، جيەكتاستار مەن ارىق جۇيەلەرى قايتا ورنالاستىرىلادى. بۇل جۇمىستار جولدىڭ شەتىندە، كولىك قوزعالىسىن شەكتەمەي جۇرگىزىلەدى.
ماۋسىمدا جاڭا اسفالت توسەلىپ، جول تاڭبالارى سىزىلادى. جول جامىلعىسى تولىقتاي جاڭارتىلىپ، قوزعالىس 36 ساعاتقا دەيىن ءىشىنارا شەكتەلەدى. اينالما جولدار مەن ۋاقىتى الدىن الا حابارلانادى.
جوبانى اياقتاۋ بيىلعى جىلدىڭ سوڭىنا جوسپارلانعان.
جۇمىس كەزىندە جاياۋ جۇرگىنشىلەر ءۇشىن قانداي جايلى جاعداي جاسالادى؟
جاياۋ جۇرگىنشىلەر ينفراقۇرىلىمىن جاڭارتۋ كەزىندە جوندەلەتىن ۋچاسكەلەردىڭ بويىندا اينالما جولدار، ارنايى قورشاۋلار، پاندۋستار جانە جارىق شاعىلىستىراتىن ەلەمەنتتەر ورناتىلادى.
كۇتىلەتىن ناتيجە قانداي؟
جوبانىڭ ماقساتى — تيميريازيەۆ كوشەسىندەگى قولدانىستاعى BRT جەلىسىن رايىمبەك باتىر داڭعىلىنداعى سالىنىپ جاتقان جەلىمەن بىرىكتىرۋ. سونىڭ ناتيجەسىندە BRT جەلىسى شىعىس-باتىس قانا ەمەس، وڭتۇستىك-سولتۇستىك باعىتىنداعى كولىك بايلانىسىن دا ارتتىرادى. جەلتوقسان كوشەسىندەگى اۆتوبۋستاردىڭ ورتاشا جىلدامدىعى 40%-عا، ال جولاۋشىلار لەگى 30%-عا ارتپاق.
جاڭالىقتاردى قايدان بىلۋگە بولادى؟
قولعا الىنعان جۇمىستار، كولىك قوزعالىسىنداعى وزگەرىستەر تۋرالى اقپارات تۇراقتى تۇردە Almaty_Joly Telegram ارناسى، قالا اكىمدىگىنىڭ الەۋمەتتىك جەلىلەرى، سونداي-اق، 2GIS پەن ياندەكس كارتالارى سەرۆيستەرى ارقىلى جاريالانىپ وتىرادى.