الماتىدا حالىقارالىق جاستار كۇنىنە ارنالعان «Alma Love» جاستار فەستيۆالى اياسىندا «JASTAR JOLY» كۆەست-ويىنى جانە «SOCIAL LAB» الەۋمەتتىك جوبالار كورمەسى سىندى ەكى ماڭىزدى ءىس-شارا ۇيىمداستىرىلدى. بۇل تۋرالى قالالىق جاستار ساياساتى باسقارماسى حابارلادى.
كۆەست-ويىنعا قاتىسۋعا 1000-نان استام جاس تۇرعىن ءوتىنىش ءبىلدىردى. ىرىكتەۋ كەزەڭىنىڭ قورىتىندىسى بويىنشا شامامەن 40 كوماندا جارىسقا جولداما الدى. بەس كەزەڭنەن تۇرعان كۆەست بارىسىندا قاتىسۋشىلار قالانىڭ ساياباقتارىمەن ءجۇرىپ ءوتىپ، ۇيىمداستىرۋشىلاردىڭ تاپسىرمالارىن ورىندادى، الماتىنىڭ تاريحى مەن مادەنيەتى جونىندەگى سۇراقتارعا جاۋاپ بەردى جانە ينتەراكتيۆتى ويىندارعا قاتىستى.
– بۇل كۆەست مەن ءۇشىن قىزىقتى ءارى پايدالى تاجىريبە بولدى. سۇراقتار ءارتۇرلى تاقىرىپتاردى قامتىدى: كەيبىرى لوگيكا مەن ءبىلىمدى، كەيبىرى تەز شەشىم قابىلداۋدى تالاپ ەتتى. وسى ويىن ارقىلى الماتى جايلى كوپ جاڭا مالىمەت ءبىلدىم، بۇرىن بارماعان جەرلەرىمدى كوردىم. سونداي-اق كوماندالىق جۇمىستىڭ ماڭىزدىلىعىن سەزىندىم جانە جاڭا ادامدارمەن تانىستىم، – دەدى جوبا قاتىسۋشىسى ماقسات ساعدييەۆ.
ءتورت كەزەڭنىڭ ناتيجەسى بويىنشا ارباتتا وتكەن گراند-فينالعا بەس ۇزدىك كوماندا شىقتى. جەڭىمپازدار ماراپاتتالدى.
فەستيۆال اياسىنداعى تاعى ءبىر ماڭىزدى شارا – «SOCIAL LAB» كورمەسى قالانىڭ ەڭ ءىرى ساۋدا ورتالىقتارىنىڭ بىرىندە ءوتتى. وندا 20-دان استام جاستار جوباسى تانىستىرىلدى: ينكليۋزيۆتى تەاتر، ۆولونتەرلىك باستامالار، اشىق اسپان استىنداعى كينوپوكازدار، تەگىن وقۋ كۋرستارى، «تىلدەر ساياباعى» جوباسى، پروفيلاكتيكالىق باعدارلامالار، سونداي-اق جاساندى ينتەللەكت پەن روبوتوتەحنيكا باعىتىنداعى باستامالار.
– كورمەنىڭ باستى ماقساتى – الەۋمەتتىك ماڭىزى بار جوبالاردى تۇرعىندارعا تانىستىرۋ جانە ولاردى قولداۋ. ءبىز جاستاردىڭ باستامالارىن ىسكە اسىرۋعا جانە ولاردى قوعامدىق ومىرگە بەلسەندى تارتۋعا جاعداي جاسايمىز، – دەدى جاستار ساياساتى باسقارماسىنىڭ باسشىسى ازيز قاجدەنبەك.
كورمە قالا تۇرعىندارى مەن قوناقتارىنىڭ قىزىعۋشىلىعىن تۋدىردى. – مۇندا كوپتەگەن پايدالى ءارى قىزىقتى جوبالاردى كوردىم. بولاشاقتا وسىنداي باستامالارعا قاتىسىپ، ۇلەس قوسقىم كەلەدى، – دەدى جاس قاتىسۋشى عاني مامىر.
ايتا كەتەيىك، الماتىدا 3 تامىزدان باستاپ حالىقارالىق جاستار كۇنىنە ارنالعان ونكۇندىك ءوتىپ جاتىر. باعدارلامادا ەكولوگيالىق اكسيالار، سپورتتىق تۋرنيرلەر، كۆەست-ويىندار، Open Mic فورماتىنداعى كونسەرتتەر جانە باسقا دا شارالار بار. فەستيۆالدىڭ سالتاناتتى جابىلۋى 12 تامىزدا بالۋان شولاق اتىنداعى سپورت كەشەنىندە وتەدى. قوناقتاردى قازاقستاندىق ەسترادا جۇلدىزدارىنىڭ قاتىسۋىمەن گالا-كونسەرت جانە الماتىنىڭ بەلسەندى جاستارىن ماراپاتتاۋ ءراسىمى كۇتىپ تۇر. كىرۋ تەگىن.