ق.ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ اكت زالىندا الماتى جاستارىنىڭ اسىعا كۇتكەن ءبىلىم باسەكەسى – «IQ-ALA JASTARY» ينتەللەكتۋالدى ويىنىنىڭ فينالدىق كەزەڭى ءوتىپ جاتىر.
الماتى قالاسى جاستار ساياساتى باسقارماسىنىڭ قولداۋىمەن «جاۋھار» قوعامدىق قورى ۇيىمداستىرعان زياتكەرلىك دودا مەملەكەتتىك رامىزدەر كۇنىنە ورايلاستىرىلعان.
جوبانىڭ ماقساتى – جاستاردىڭ بىلىمگە قۇشتارلىعىن وياتۋ، شىعارماشىلىق قابىلەتتەرىن شىڭداۋ، ۇلتتىق قۇندىلىقتاردى ناسيحاتتاۋ.
يسمايل نۇريسلام ورازا ۇلى، «جاۋھار» قوعامدىق قورىنىڭ ديرەكتورى:
– بيىل «IQ-ALA JASTARY» ويىنىنا مىڭنان اسا جاس قاتىستى. ىرىكتەۋ كەزەڭدەرىندە 100-دەن اسا كوماندا ءوزارا ب ا ق سىنادى. سوڭعى فينالعا ءار ليگا بويىنشا 5 ۇزدىك كوماندادان ىرىكتەلىپ، 20 كوماندا جولداما الدى. جۇلدە قورى – 1 000 000 تەڭگە. بۇل – جاستاردى ىنتالاندىرۋدىڭ ءبىر جولى.
فينال تورىندە ءتورت ءتۇرلى ساناتتاعى كوماندالار – ستۋدەنتتەر، جۇمىسشى جاستار، بەلسەندى جاستار جانە ءتۇرلى الەۋمەتتىك توپتار وكىلدەرى ءوزارا ءبىلىم مەن لوگيكا بويىنشا سىنعا ءتۇسىپ جاتىر.
ويىن بارىسىندا كوماندالار كۇردەلى سۇراقتارعا جاۋاپ بەرىپ، ءوزارا تىعىز باسەكەگە ءتۇستى. ءار قاتىسۋشىنىڭ جۇزىنە تولقۋ مەن سەنىمدىلىك قاتار ۇيالاعان.
شۇعىلا بۇرلىبايەۆا، «اققۋ، شورتان ءھام شايان» كومانداسىنىڭ مۇشەسى:
– كوماندامىز بىرنەشە جىلدان بەرى بىرگە ويناپ كەلەدى. الماتىداعى ءتۇرلى ينتەللەكتۋالدى جارىستارعا قاتىسقان تاجىريبەمىز بار. كەي سۇراقتار، اسىرەسە تاريحي تاستارعا بايلانىستىسى، قيىن ءتيدى. ءبىراق ءادىل ءارى تارتىستى ءوتىپ جاتقان ويىننىڭ رۋحى ەرەكشە.
سايلاۋ ادىلەت، «فارابي سازى» كومانداسىنىڭ كاپيتانى:
– قوبالجۋ بار، ارينە. ءبىراق اتموسفەرا وتە تاماشا. كوماندالىق جۇمىس كەزىندە شەشىم قابىلداۋ قيىنعا سوعادى. اركىمنىڭ پىكىرى بار. سوڭعى شەشىمدى كاپيتان رەتىندە ءوزىم قابىلدايمىن. جەڭىستەن ءۇمىتىمىز زور.
جوبا جاستار اراسىندا ەرەكشە قولداۋ تاپتى. ۇيىمداستىرۋشىلاردىڭ ايتۋىنشا، بۇل ينتەللەكتۋالدىق سايىس ءداستۇرلى فورماتقا اينالعان. بيىلعى قاتىسۋشىلار سانى مەن قىزىعۋشىلىق كورسەتكىشى – سونىڭ دالەلى. سەبەبى، مۇنداي شارالار جاستاردى ءبىر ماقساتقا جۇمىلدىرىپ قانا قويماي، ولاردىڭ بىلىمگە دەگەن ۇمتىلىسىن ارتتىرىپ، بولاشاق كوشباسشىلاردىڭ قالىپتاسۋىنا جول اشادى.
P.S. قازىرگى ساتتە ويىن قىزا تۇسۋدە. كىم جەڭىمپاز اتانادى؟ بۇل سۇراقتىڭ جاۋابى سالدەن سوڭ بەلگىلى بولماق.