22 قازاندا الماتى قالاسىن اباتتاندىرۋ جوبالارى بويىنشا ونلاين داۋىس بەرۋ باستالدى. بۇل پروسەسس 2024 جىلدىڭ 1 قاراشاسىنا دەيىن جالعاسادى، دەپ حابارلايدى aqshamnews.kz
«حالىق قاتىساتىن بيۋدجەت» باعدارلاماسى اياسىندا تۇرعىندار قالانى كورىكتەندىرۋ بويىنشا وزدەرىنە ۇنايتىن جوبالاردى قولداۋ مۇمكىندىگىنە يە بولادى.
داۋىس بەرۋ budget.open-almaty.kz پورتالىندا جۇزەگە اسىرىلادى. پورتالدىڭ باستى بەتىندە قاتىسۋشىلار ۇشتەن اسپايتىن جوبانى تاڭداپ، ءوز داۋىسىن بەرۋ ءۇشىن ەلەكتروندىق سيفرلىق قولتاڭبا (ەسق) نەمەسە SMS-كود ارقىلى راستاۋ جاساي الادى.
قالانىڭ ءاربىر ەرەسەك تۇرعىنى، تۇراقتى تۇرۋعا ىقتيارحاتى بار بولسا، جوبالارعا داۋىس بەرە الادى. جالپى، مەگاپوليستىڭ تۇرعىندارىنان 6118 ءوتىنىش ءتۇستى، ولاردىڭ ىشىندە 1402 جوبا داۋىس بەرۋگە رۇقسات الدى. ەڭ كوپ داۋىس جيناعان جوبالاردى اۋدان اكىمدىكتەرى 2025 جىلى ىسكە اسىرادى.
«حالىق قاتىساتىن بيۋدجەت» باعدارلاماسى تۋرالى قوسىمشا اقپارات پەن كەڭەستەردى اۋدان اكىمدىكتەرىنەن نەمەسە الماتى Open Almaty قوعامدىق قابىلداۋ بولمەسىنەن 224 39 29 تەلەفونى ارقىلى (ىشكى تەل. 203) الۋعا بولادى.
الماتى اكىمى ەربولات دوسايەۆتىڭ تاپسىرماسىنا سايكەس، 2024 جىلى «حالىق قاتىساتىن بيۋدجەت» باعدارلاماسىنىڭ قارجىلاندىرۋى 18،8 ملرد تەڭگەگە دەيىن وسكەنىن ەسكە سالامىز (2023 جىلى — 12،9 ملرد). اۋدان اكىمدىكتەرى 2023 جىلعى جەڭىمپاز جوبالاردى جۇزەگە اسىرۋدى جالعاستىرىپ جاتىر، بۇگىنگە دەيىن 261 جوبا ىسكە اسىرىلدى.