بىلتىر جىل سوڭىنا تامان مەگاپوليستە ەرتە ارالاسۋ الەۋمەتتىك قىزمەتتەر ورتالىعى اشىلىپ، جۇمىس ىستەي باستاعان بولاتىن. از ۋاقىت ىشىندە ءبىراز جۇمىستى ەڭسەرىپ تە تاستادى. ەندى بۇگىن سول ورتالىقتىڭ لەنتاسى سالتاناتتى تۇردە قيىلدى.
دەمەك تولىققاندى ىسكە كىرىستى دەگەن ءسوز. كابينەتتەرى دە تولىق جاراقتالعان. كەڭ ءارى جاپ-جارىق.
الماتى قالاسىندا ەرتە ارالاسۋ باعدارلاماسىن ىسكە اسىرۋدىڭ تەتىگى 2023 جىلى وتكىزىلگەن پيلوتتىق جوبانىڭ ناتيجەلەرى مەن ۇكىمەتتىك ەمەس ۇيىمداردىڭ، اتاپ ايتقاندا «كەڭەس»، «اردي» جانە «دارا» قوعامدىق قورلارىنىڭ قۇندى تاجىريبەسىنە نەگىزدەلگەن.
ءيا، شاھاردا بالالار ورتالىعى، وڭالتۋ ورتالىقتارى از ەمەس. دەگەنمەن الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنا قارايتىن ءبىز ايتىپ وتىرعان ورتالىق بارىنەن وزگەشە دەسەك قاتەلەسپەيمىز. بىرەگەيلىگى سول – الماتى قالاسىنىڭ اكىمى بەكىتكەن رەگلامەنت نەگىزىندە دەنساۋلىق ساقتاۋ، ءبىلىم بەرۋ جانە الەۋمەتتىك قورعاۋ باسقارمالارى ۇشتىك وداق رەتىندە ءوزارا تىعىز بايلانىستا جۇمىس ىستەۋدى كوزدەپ وتىر. ياعني وسى ءۇش ۆەدوموستۆو وكىلدەرى ەرتەڭگى كۇنى كەش بولىپ قالماۋ، مۇگەدەكتىكتىڭ الدىن الۋ ءۇشىن، كىشكەنتاي بالدىرعانداردىڭ ءومىرىنىڭ ەڭ ماڭىزدى دەگەن وسىناۋ دامۋ كەزەڭىندە فيزيكالىق، كوگنيتيۆتى، ەموسيونالدى جانە الەۋمەتتىك جاعىنان كاسىبي قىزمەتتەردى بىرلەسىپ كورسەتۋگە نيەتتى.
«ورتالىقتىڭ اشىلۋى – ەرتەرەك، دەر شاعىندا كومەك كورسەتىلۋى ءتيىس بالالارى بار وتباسىلارعا الەۋمەتتىك قولداۋدى دامىتۋداعى ماڭىزدى قادام. ءبىز بىرلەسكەن كۇش-جىگەرمەن ءاربىر بالانىڭ لايىقتى بولاشاعىن قامتاماسىز ەتە الاتىنىمىزعا سەنىمدىمىز»، – دەدى سالتاناتتى جيىندا ءسوز سويلەگەن الماتى قالاسى ءماسليحاتىنىڭ ءتوراعاسى مەيىرجان وتىنشييەۆ.
بۇگىندە اتالعان ورتالىققا دامۋىندا كەشەۋىلدەۋ بايقالعان، اۋتيزم، زپر دياگنوزى قويىلعان 130 بالا كەلىپ ءجۇر. ورەندەردىڭ يگىلىگى ءۇشىن لوگوپەد، پەدياتر، فيزيوتەراپيەۆت، پسيحولوگ، ارنايى پەداگوگ، الەۋمەتتىك قىزمەتكەرلەردەن قۇرالعان، 30 ادامنان تۇراتىن ۇيلەسىمدى توپ جۇمىس ىستەيدى. بۇل – ۇلكەن كۇش.
«ۇلىمنىڭ قاتارلاستارىنا قاراعاندا وزگەشەلەۋ ەكەنىن ءبىر اي بۇرىن عانا بايقادىق. دەرەۋ دابىل قاقتىق. تىركەلگەن ەمحانامىزدىڭ دارىگەرى وسى ورتالىق تۋرالى ايتتى. مۇندا كەلگەنىمىزگە ەكى-اق كۇن بولدى. دەگەنمەن، ورتالىقتاعى جىلى اۋرا، بارىنە جۇرەگىن الىپ جۇگىرۋگە دايىن جىلى ءجۇزدى ماماندار مەنى بىردەن باۋراپ الدى. «بۇگىن قالاي ۇيىقتاپ تۇردىڭىزدار؟»، – دەپ جاي عانا اماندىق-ساۋلىق سۇراسۋىنىڭ ءوزى بويىڭا قۋات بەرەدى. مۇندا بالانى دامىتۋعا دەگەن ىقىلاسى جوعارى مىقتى ماماندار جاساقتالعان دەسەم، قاتەلەسپەيمىن. الماتى اكىمدىگىنە راحمەت، بىزگە وسىنداي تەگىن ورتالىق اشىپ بەرگەن! ءبىز سەكىلدى اتا-انالارعا دەمەۋ بولۋ مييسياسىن دا قوسا اتقارىپ جۇرگەن جاندارعا العىستان باسقا ايتارىم جوق»، – دەيدى ەكى جاسقا تاياپ قالعان ءياسيننىڭ اناسى ارايلىم.
ورتالىقتىڭ اشىلۋ سالتاناتىندا سىيلىققا كەنەلگەن بالالاردىڭ دا قۋانىشىندا شەك جوق. ۇلكەن-كىشى بىرگە قۋانىپ ءجۇر دەسەك تە ارتىق ايتقاندىق ەمەس.
«ورتالىققا تورتتەگى ءامينامدى اكەلىپ ءجۇرمىن. جيەنىم عوي. اكە-شەشەسى جۇمىستا، سوندىقتان ولارعا قولداۋ كورسەتىپ، تىرەۋ بولعىم كەلەدى. ءاميناما قاراپ كەيدە مۇڭايىپ تا قالاتىن ساتتەرىم بولادى. ءالى سويلەمەيدى. قاتتى، وقىس داۋىستاردان شوشىپ، جىلاپ جىبەرەدى. بۇرىن وتە مازاسىز بولاتىن. ءقازىر وسى ورتالىقتان اۆا تەراپياسىن الىپ ءجۇرمىز. ناتيجە بار. ءامينامنىڭ كىشكەنتاي جەتىستىگىندە وسى ورتالىقتىڭ ءاربىر قىزمەتكەرىنىڭ ۇلەسى بار دەپ سانايمىن. ايتپاقشى، بىزگە الداعى ۋاقىتتا تاكسيمەن ءجۇرۋ تەگىن بولادى ەكەن. ءبىراق بالاپانىمدى قازىردەن ادەيى قوعامدىق كولىكپەن الىپ جۇرەمىن. سەبەبى، وعان ادامدارمەن جاندى قارىم-قاتىناس ءھام اينالاسىنداعى قۇبىلىستاردى سەزىنۋى كەرەك دەپ ويلايمىن. ەكى جارىم جاسىنان وسىلاي جەتەكتەپ كەلەمىن. ول ءۇشىن شارشامايمىن»، – دەيدى زەينەتكەر زياگۇل مۇقاش قىزى.