قالا بويىنشا ورتاشا ايلىق جالاقى رەسپۋبليكالىق دەڭگەيدەن 16،3%-عا جوعارى بولىپ تۇر.
الماتى اكىمىنىڭ ورىنباسارى ءىلياس وسەروۆ وڭىرلىك كوممۋنيكاسيالار قىزمەتىنىڭ ونلاين باسپاسوز-كونفەرەنسياسىندا شوب قولداۋ مەن قالا تۇرعىندارىن جۇمىسپەن قامتۋ شارالارى تۋرالى ايتتى، دەپ حابارلايدى Almaty-akshamy.kz.
ءىلياس وسەروۆتىڭ مالىمەتتەرى بويىنشا، اعىمداعى جىلدىڭ 1 ماۋسىمىنا الماتىدا 31 مىڭ جۇمىس ورنى اشىلدى. بۇل رەتتە قالا بويىنشا ورتاشا ايلىق جالاقى رەسپۋبليكالىق دەڭگەيدەن 16،3%-عا جوعارى جانە جىل سايىن وسۋدە.
اعىمداعى جىلى شوب جەڭىلدىكپەن نەسيەلەندىرۋ قۇرالدارى كەڭەيدى، بۇل قالا تۇرعىندارىنىڭ جۇمىسپەن قامتىلۋىنا وڭ اسەرىن تيگىزدى. نەسيەنى جەڭىلدىك شارتتارمەن قايتا قارجىلاندىرۋ، سونداي-اق نەسيەلەر بويىنشا مەرزىمىن ۇزارتۋ مۇمكىندىگى بەرىلدى. زارداپ شەككەن سالالار ءۇشىن سالىقتىق ىنتالاندىرۋ شارالارى قابىلداندى.
قولداۋ باعدارلامالارىنىڭ ارقاسىندا شاعىن جانە ورتا كاسىپكەرلىكتىڭ جۇمىس جاسايتىن سۋبەكتىلەرىنىڭ سانى شامامەن 1%-عا ءوستى.
2020 جىلى 74 مىڭنان استام كاسىپكەر سالىقتىق جەڭىلدىكتەرگە يە بولدى. زارداپ شەككەن سالالاردىڭ 3 مىڭ قارىز الۋشىلارىنىڭ نەسيەلەرى كەيىنگە قالدىرىلدى، 300-دەن استام كاسىپكەر كوممۋنالدىق مەنشىك نىساندارىندا جالداۋ اقىلارىن تولەۋدەن بوساتىلدى. ارزان مولشەرلەمە بويىنشا كاسىپكەرلەردىڭ 1 مىڭنان استام جوبالارى قارجىلاندىرىلدى.
«كاسىپكەرلەردىڭ ءتيىمدى جۇمىس ىستەۋى ءۇشىن ءبىز نارىققا قاتىسۋشىلار اراسىندا ءوزارا ءتيىمدى جانە ۇزاق مەرزىمدى ەكونوميكالىق قارىم-قاتىناستى قالىپتاستىرۋ ءۇشىن جاعداي جاسايمىز»، - دەپ حابارلادى ءىلياس وسەروۆ.
ماسەلەن، الماتى بانكتەرى 3 ترلن تەڭگەدەن استام نەسيە بەردى. ونىڭ ىشىندە 643،9 ملرد تەڭگەنى شاعىن كاسىپكەرلىك ءۇشىن نەسيەلەر قۇرادى. جالپى، جىل باسىنان بەرى شاعىن بيزنەستى نەسيەلەۋ 2،6 ەسە ءوستى.
«جوعارى تابىستى جۇمىس ورىندارىن قۇرۋ ءۇشىن ءبىز ەكونوميكادا قۇرىلىمدىق مانيەۆر جاساۋعا كىرىستىك. بۇل قۇرىلىمدىق مانيەۆر باسىم سالالاردى دامىتۋ كورىنىس تاپقان الماتى-2050 ستراتەگياسىندا قاراستىرىلعان. تۋريزم، سيفرلاندىرۋ، كرەاتيۆتى ەكونوميكا سالالارى دامۋدىڭ باستى سالالارى بولىپ بەلگىلەندى»، - دەپ اتاپ ءوتتى ءىلياس وسەروۆ.