الماتىدا پەدياتريالىق شۇعىل كومەكتى دامىتۋدا ماڭىزدى قادام جاسالدى — قالالىق بالالار كلينيكالىق جۇقپالى اۋرۋلار اۋرۋحاناسى (قبكجاا) بازاسىندا مەديسينالىق كادرلاردى وقىتۋدىڭ زاماناۋي سيمۋلياسيالىق ورتالىعى جۇمىسىن باستادى.
جاڭا الاڭ بارلىق دەڭگەيدەگى مەديسينالىق مامانداردى بالالارعا شۇعىل جانە كريتيكالىق كومەك كورسەتۋگە دايىنداۋعا ارنالعان. ورتالىقتىڭ باستى ەرەكشەلىگى — پاسيەنتتەردى تارتپاي، ءقاۋىپسىز جانە باقىلاناتىن ورتادا وقىتۋ. پراكتيكالىق داعدىلار ناقتى كلينيكالىق جاعدايلاردى مودەلدەيتىن جوعارى دالدىكتى ترەناجەرلاردا جەتىلدىرىلەدى. بۇل فورمات حالىقارالىق ستاندارتتارعا سايكەس كەلەدى جانە وقىتۋدى ناقتى تاجىريبەگە بارىنشا جاقىنداتادى.
اشىلۋ كۇنى قوناقتارعا ورتالىقتىڭ مۇمكىندىكتەرى مەن ىسكە اسىرىلىپ جاتقان وقىتۋ باعدارلامالارى ۇسىنىلدى: نەگىزگى جانە كەڭەيتىلگەن جۇرەك-وكپە رەانيماسياسى بويىنشا ترەنينگتەر، ورتا مەديسينالىق پەرسونالدى دايارلاۋ تاسىلدەرى، توتەنشە جاعدايلاردا كوماندالىق ءوزارا ءىس-قيمىل قاعيداتتارى. زاماناۋي سيمۋلياسيالىق جابدىقتار مەن وقىتۋ ادىستەمەلەرىنە ەرەكشە نازار اۋدارىلدى.
ورتالىقتا بازالىق رەانيماسيالىق ءىس-شارالار، اۋىر جانە سىني جاعدايلار كەزىندەگى ارەكەتتەر، بالالارعا العاشقى كومەك كورسەتۋ بويىنشا تۇراقتى وقىتۋ، سونداي-اق مەديسينالىق پەرسونالدىڭ كوماندالىق جۇمىسىن پىسىقتاۋ جوسپارلانۋدا. PALS باعدارلامالارى بويىنشا انەستەزيولوگ-رەانيماتولوگ دارىگەرلەر ءۇشىن كەڭەيتىلگەن رەانيماسيالىق وقىتۋ قاراستىرىلعان — شەكتەۋلى ۋاقىت ىشىندە شەشىم قابىلداۋ، رولدەردى ناقتى ءبولۋ جانە ءتيىمدى كوماندالىق كوممۋنيكاسياعا باسا نازار اۋدارىلادى.
ورتا مەديسينالىق پەرسونالدى دايارلاۋعا ەرەكشە كوڭىل بولىنەدى. سيمۋلياسيالىق وقىتۋ جاعدايىندا مەدبيكەلەر بىرنەشە رەت پراكتيكالىق داعدىلاردى قولدانا الادى — ينەكسيالار مەن پەريفەريالىق تامىرلاردى كاتەتەريزاسيالاۋدان باستاپ، اسقازاندى شايۋ جانە باسقا پروسەدۋرالارعا دەيىن — قاتاڭ بەكىتىلگەن الگوريتمدەر بويىنشا جانە پاسيەنتتەر ءۇشىن ءقاۋىپسىز.
قبكجاا ديرەكتورى ەرجان سەرالين الدىڭعى قاتارلى جۇقپالى اۋرۋلار قىزمەتىندە 80 جىلدان استام جۇمىس ىستەگەن اۋرۋحانا ءۇشىن سيمۋلياسيالىق ورتالىقتىڭ اشىلۋى ماڭىزدى وقيعا بولعانىن اتاپ ءوتتى. ونىڭ ايتۋىنشا، ورتالىق مەديسينا قىزمەتكەرلەرىن زاماناۋي جابدىقتاردى پايدالانا وتىرىپ، كۇندەلىكتى تاجىريبەگە دە، توتەنشە جاعدايلاردا جۇمىسقا دا دايىنداۋعا مۇمكىندىك بەرەدى.
وقۋ ساباقتارىن گەرمانيا مەن استانادا مامانداندىرىلعان دايارلىقتان وتكەن جوعارى ساناتتى انەستەزيولوگ-رەانيماتولوگ-جاتتىقتىرۋشىلار كەنەمبايەۆا اليا گاۋازوۆنا جانە مانسۋروۆا ماريا الەكساندروۆنا وتكىزەدى.
جوبانى ىسكە اسىرۋ وقىتۋدىڭ تاجىريبەگە باعدارلانعان تۇراقتى مودەلىن قالىپتاستىرۋعا، مەديسينالىق قاتەلىكتەر ءقاۋپىن ازايتۋعا جانە قىزمەتكەرلەردىڭ سىني جاعدايلاردا ىس-ارەكەتكە دايىن بولۋىنا مۇمكىندىك بەرەدى. سيمۋلياسيالىق ورتالىقتىڭ اشىلۋى كادرلىق الەۋەتتى نىعايتۋدا جانە حالىقتىڭ دەنساۋلىق ساقتاۋ جۇيەسىنە دەگەن سەنىمىن ارتتىرۋدا ستراتەگيالىق ماڭىزدى قادام بولىپ تابىلادى.
اشىلۋ سالتاناتىنا پروفەسسور ماريا وماروۆا، پەدياتريا جانە بالالار حيرۋرگياسى عىلىمي ورتالىعىنىڭ ديرەكتورلار كەڭەسىنىڭ ءتوراعاسى، اۋرۋحانا باسشىلىعى، سيمۋلياسيالىق ورتالىقتىڭ جاتتىقتىرۋشىلارى جانە مەديسينالىق قوعامداستىق وكىلدەرى قاتىستى.