الماتى اكىمى دارحان ساتىبالدىنىڭ توراعالىعىمەن بالالارعا ارنالعان عىلىم مۋزەيىنىڭ قۇرىلىس بارىسى مەن ىسكە قوسۋعا دايىندىق ماسەلەلەرىنە ارنالعان كەڭەس ءوتتى. بۇل — بالالاردىڭ عىلىم مەن تەحنولوگياعا قىزىعۋشىلىعىن ارتتىرۋعا باعىتتالعان جاڭا ءبىلىم بەرۋ كەڭىستىگى.
كەڭەستە اتقارىلىپ جاتقان جۇمىستاردىڭ جاي-كۇيى تالقىلاندى. قازىرگى ۋاقىتتا عيماراتتىڭ ينجەنەرلىك جۇيەلەرى مەن كونسترۋكسيالارىن مونتاجداۋ جالعاسۋدا، شىنى كۇمبەز ورناتىلىپ جاتىر، ەكسپوزيسيا ەلەمەنتتەرى مەن مۋلتيمەديالىق ينستاللياسيالار ازىرلەنۋدە. ەكسپوزيسيالاردىڭ العاشقى لەگى الماتىعا بەكىتىلگەن مەرزىمنەن بۇرىن جەتكىزىلدى. سونىمەن قاتار مۋزەي كونتەنتىن ازىرلەۋ بويىنشا دا بەلسەندى جۇمىس جۇرگىزىلۋدە: فوكۋس-توپتار ۇيىمداستىرىلىپ، ساراپتامالىق تالقىلاۋلار وتۋدە.
مۋزەيدىڭ بولاشاق مازمۇنى دا كەڭەيىپ كەلەدى. باعىتتاردىڭ ءبىرى — بالالارعا ءقاۋىپسىز مىنەز-قۇلىق داعدىلارىن قالىپتاستىرۋعا ارنالعان ءبىلىم بەرۋ انيماسياسى مەن ينتەراكتيۆتى باعدارلامالار ازىرلەۋ. بۇل بۋللينگ جاعدايلارىندا، قۇرداستار اراسىنداعى جانجالعا جانە ومىردە كەزدەسەتىن باسقا دا قيىندىقتارعا دۇرىس ءارى سەنىمدى ارەكەت ەتۋگە ۇيرەتۋگە باعىتتالعان. وسىلايشا مۋزەي تەك عىلىمي-اعارتۋشىلىق ەمەس، سونىمەن بىرگە الەۋمەتتىك ماڭىزى بار ورتالىققا اينالماق.
بولاشاق مۋزەيدىڭ وپەراسيالىق مودەلى دە قالىپتاستىرىلۋدا: ىشكى رەگلامەنتتەر، ستاندارتتار، راسىمدەر جانە لاۋازىمدىق نۇسقاۋلىقتار ازىرلەنىپ جاتىر. قىزمەتكەرلەردى دايارلاۋ مەن حالىقارالىق تاجىريبەنى زەردەلەۋگە ەرەكشە ءمان بەرىلۋدە، سونىڭ ىشىندە Singapore Science Centre ورتالىعىنىڭ تاجىريبەسى قاراستىرىلۋدا. مۋزەيدىڭ اشىلۋى 2026 جىلدىڭ ماۋسىمىنا جوسپارلانعان.
دارحان ساتىبالدى بالالارعا ارنالعان بۇل كەڭىستىكتىڭ مازمۇنى مەن قۇرىلىسى تولىقتاي بالالاردىڭ قاجەتتىلىكتەرىنە باعىتتالۋى، بارلىق ساپا جانە قاۋىپسىزدىك تالاپتارىنا ساي بولۋى كەرەكتىگىن اتاپ ءوتتى. الماتى اكىمى قۇرىلىس بارىسىنا، مەرزىمنىڭ ساقتالۋىنا جانە مۋزەيدى مازمۇنمەن تولىقتىرۋعا قاتاڭ باقىلاۋدى قامتاماسىز ەتۋدى تاپسىردى. ول بۇل نىسان ەلدەگى ەڭ ۇزدىك بالالار ءعىلىمي-بىلىم بەرۋ ورتالىقتارىنىڭ ءبىرى بولۋى ءتيىس ەكەنىن ايتتى.