الماتىنىڭ مەملەكەتتىك اكتيۆتەر باسقارماسى بۇرىنعى بالاباقشا عيماراتتارى مەن كومبيناتتىڭ ءبىر عيماراتىن قالانىڭ مەنشىگىنە قايتارماق. بۇل باستاما بىرتىندەپ جاڭادان مەملەكەتتىك بالاباقشالاردى اشۋدى تاپسىرعان قالا اكىمىنىڭ تاپسىرماسىمەن ىسكە اسقالى وتىر. وڭىرلىك كوممۋنيكاسيالار قىزمەتىندە الماتى قالاسىنىڭ مەملەكەتتىك اكتيۆتەر باسقارماسى باسشىسىنىڭ ورىنباسارى جانتورە ايتجانوۆتىڭ ايتۋىنشا، جالعا الۋ شارتىنىڭ باسىم بولىگى بۇزىلىپ، ءقازىر تاراپتاردىڭ ەكى نىساندى قايتارۋ ءۇشىن سوتتاسىپ جاتقانى ءمالىم بولدى.
2002 جىلدان باستاپ 11 جەكە مەنشىك پەن ارناۋلى ورتا ءبىلىم بەرۋ مەكەمەسىنە، اتاپ ايتقاندا «اق نيەت»، «ەلكو»، «ليدەر»، «اراي»، «ماگيستر»، «سەنىم»، «كاسىپكەرلەر مەكتەبى»، «كوگىلدىر جەلكەن»، «تەرەموك»، «ايگەرىم» مەن الماتى مەنەدجمەنت جانە سەرۆيس كوللەدجىنە 10 بالاباقشا مەن ءبىر كومبينات عيماراتى جالعا بەرىلگەن.
2020 جىلدىڭ مامىر ايىندا الماتى قالاسىنىڭ اكىمى باقىتجان ساعىنتايەۆ جەكە ۇيىمدارمەن جاسالعان مۇلىكتى جالعا بەرۋ شارتتارىن كەزەڭ-كەزەڭىمەن بۇزۋ تۋرالى شەشىم قابىلداعان. بۇل شەشىم مەكتەپكە دەيىنگى جاڭا ۇيىمداردى قۇرۋ ءۇشىن قابىلدانعان بولاتىن. ەندى وسى وقۋ ورىندارىمەن جاسالعان بارلىق جالعا الۋ شارتى قايتا بۇزىلدى.
2023 جىلدىڭ ماۋسىم ايىندا «اراي» مەن «سەنىم» مەكەمەسىنە نىسانداردى قايتارۋ تۋرالى رەسمي حابارلاما جولدانىپ، شىلدە ايىندا اراداعى جالعا الۋ شارتى بۇزىلعانىمەن، ولار نىساندى بوساتۋدان باس تارتقان ەدى. وسىعان بايلانىستى الماتى قالاسىنىڭ مەملەكەتتىك اكتيۆتەر باسقارماسى الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا تالاپ ارىز بەرىپ، سوت تالاپتى قاناعاتتاندىردى.
سوتتىڭ شەشىمىنە قاراماستان، «اراي» مەن «سەنىم» مەكەمەسىنىڭ قىزمەتكەرلەرى بۇل نىسانداردا ءالى وتىر. الماتىداعى ادىلەت دەپارتامەنتىنە ولاردى ماجبۇرلەپ شىعارۋ ماتەريالى تاپسىرىلدى. «اراي» مەكەمەسى عيماراتتى 2025 جىلعى 1 قىركۇيەككە دەيىن بوساتۋدى كەيىنگە شەگەرۋىن سۇراعانىمەن، 3 شىلدەدە وتكەن سوت وعان كەلىسكەن جوق.
قۇقىقتىق ءراسىم اياسىندا 2025 جىلعى 14 پەن 15 شىلدەدە الماتى قالاسىنىڭ ادىلەت دەپارتامەنتى جاڭاعى مەكەمەلەردى نىساننان شىعارا باستاماق.
اتالعان نىسانداردى كوممۋنالدىق مەنشىككە قايتارۋ مەن ولاردى قۇرىلىس-جوندەۋ جۇمىسىنا دايارلاۋ بارىسى زاڭ شەڭبەرىندە ىسكە استى.