مامانداردىڭ مالىمەتىنشە، بۇل قۇبىلىس ءبىرقاتار مەتەورولوگيالىق فاكتوردىڭ توعىسۋىمەن بايلانىستى، دەپ حابارلايدى aqshamnews.kz
سينوپتيكتەردىڭ حابارلاۋىشا، 1 شىلدە كۇنى ەلىمىزدىڭ ءۇش قالاسىندا اتموسفەرادا لاستاۋشى زاتتاردىڭ جوعارى مولشەردە جينالۋى كۇتىلەدى. ولار اتموسفەرانىڭ تومەنگى قاباتىندا زياندى قوسپالاردىڭ جينالىپ، تارالماي قالۋىنا سەبەپ بولادى.
«2025 جىلعى 1 شىلدەدە الماتى، اقتوبە قالالارىندا جانە تۇندە استانا قالاسىندا قولايسىز مەتەورولوگيالىق جاعدايلار كۇتىلەدى»، – دەلىنگەن رەسمي حابارلامادا.
قولايسىز مەتەوجاعدايلار – بۇل اۋانىڭ لاستانۋىنا اكەلەتىن تابيعي قۇبىلىستار. ولارعا مىنالار جاتادى:
تىمىق اۋا رايى؛
باياۋ سوعاتىن جەل؛
تۇمان؛
تەمپەراتۋرالىق ينۆەرسيا (جەر بەتىنە جاقىن اۋا قاباتىنىڭ جىلىراق بولۋى).
بۇل قۇبىلىستار زياندى زاتتاردىڭ اۋادا تارالۋىنا كەدەرگى كەلتىرىپ، ولاردىڭ شوعىرلانۋىنا جول اشادى. اسىرەسە، بۇل تىعىز سالىنعان تۇرعىن اۋداندار مەن ونەركاسىپتىك ايماقتاردا بايقالادى.
ءقاۋىپ نەدە؟
اۋا ساپاسىنىڭ ۋاقىتشا ناشارلاۋى تىنىس الۋ ورگاندارىنا كەرى اسەر ەتىپ، اسىرەسە بالالار، قارتتار جانە سوزىلمالى اۋرۋى بار ادامدار ءۇشىن ءقاۋىپتى بولۋى مۇمكىن. وسىنداي كۇندەرى اشىق اۋادا ۇزاق ۋاقىت بولۋدان اۋلاق بولعان ءجون، اسىرەسە تاڭعى جانە كەشكى ۋاقىتتاردا.