ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە ەلىمىزدەگى ەڭ جارقىن شىعارماشىل اۋلەتتەردىڭ بىرىنەن سانالاتىن قاسىمبەكوۆتەر تۋىندىلارىنا ارنالعان «ونەرلى اۋلەت ورنەگى» اتتى كورمە اشىلدى.
قاسىمبەكوۆتەر اۋلەتىنىڭ ءتۇپ-تامىرى جەتىسۋ الاتاۋىنىڭ ەتەگىندەگى قاسيەتتى تالدى ولكەسىنەن تارايدى. بۇل – تابيعات پەن تاريح، ۇلتتىق رۋح پەن شىعارماشىلىق بىتە قايناسىپ، ۇيلەسىم تاپقان قۇتتى مەكەن. اڭىزدارعا ارقاۋ بولعان، تاستارىنداعى پەتروگليفتەرىمەن ءۇنسىز سىر شەرتەتىن، اراسان بۇلاقتارىمەن شيپا دارىتقان، كونە وركەنيەتتەردىڭ ىزىمەن تاريح تۇنعان بۇل ولكەدەن شىققان اۋلەتكە تەرەڭ دۇنيەتانىم، قاجىرلى ەڭبەك، توزىمدىلىك پەن نازىك كوركەم تالعام دارىعان.
كورمەگە اۋلەتتىڭ بىرنەشە بۋىنى – اعا ۇرپاقتان باستاپ شوبەرەلەرگە دەيىن قاتىسىپ وتىر. ولاردىڭ قاتارىندا سوعىس ارداگەرى، سۋرەتشى ءارى ونەرتاپقىش احمەتقالي قاسىمبەكوۆ جانە ونىڭ ۇرپاعى: بالالارى بولات، ماناربەك، جانارگۇل، بەگايىم، نەمەرەلەرى ايعانىم دۋلات قىزى، گۇلميرا اپپاسوۆا، نازەركە ماناربەك قىزى، ءىلياس سليامعازى، وركەن قاسىمبەكوۆ، ادەمى نۇرتىلەۋ، سونداي-اق شوبەرەلەرى حامزا دۋلات ۇلى مەن الەن يزباساروۆ بار.
كورمەگە كەلۋشىلەر كوركەم ءتىلدىڭ ۋاقىت اعىمىنداعى ەۆوليۋسياسىن، ءار اۆتوردىڭ دارا شىعارماشىلىق قولتاڭباسىن، سونداي-اق وتباسىلىق داستۇرلەردىڭ ءار تۋىندىدا قالاي كورىنىس تاباتىنىن تاماشالاي الادى.
– ەكسپوزيسيادا ءمۇسىنشى بولات قاسىمبەكوۆتىڭ ونەرى ەرەكشە ورىن الادى. اۆتوردىڭ ءار كەزەڭدەگى – ەرتەرەكتەگى جانە كەيىنگى جىلدارداعى جۇمىستارى ۇسىنىلعان. ولاردىڭ قاتارىندا: «قورقىت» (2013)، «ابىز اتا» (قولا، 2012)، «الما ۇستاعان بالا» (گيپس، 2012)، «اباي قۇنانبايەۆ» (گيپس، 2019)، «دىنمۇحامەد قونايەۆ» (گيپس، 2020)، «شاحمات فيگۋرالارى» (قولا، 2023–2024)، سونداي-اق 2024–2025 جىلدارى قولادان قۇيىلعان تۋىندىلارى بار. سونىمەن قاتار، ونىڭ «ەلتىندى باتىر»، «شوقان ءۋاليحانوۆ»، «س.نۇرماعامبەتوۆ»، «باعاي باتىر» سىندى الماتى، ۇزىناعاش، جاركەنت جانە ماڭعىستاۋ وڭىرىندە ورناتىلعان مونۋمەنتالدى شىعارمالارىنىڭ فوتوماتەريالدارى قويىلعان، – دەيدى كورمە جەتەكشىسى گ.جۇبانوۆا.
«ونەرلى اۋلەت ورنەگى» – بۇل تەك كوركەم جەتىستىكتەردى عانا ەمەس، سونىمەن بىرگە وتباسىلىق داستۇرلەردىڭ، رۋحاني قۇندىلىقتار مەن ونەرگە دەگەن سۇيىسپەنشىلىكتىڭ قۋاتىن بەينەلەيتىن شىعارماشىلىق اۋلەتتىڭ ءتىرى شەجىرەسى. كورمە مادەنيەتتەگى ساباقتاستىقتىڭ ماڭىزىن ەسكە سالىپ، ۇلتتىق كوركەم مۇرانى ساقتاۋ مەن دامىتۋعا شابىت بەرەدى.