الماتىداعى №2 بالالار قالالىق كلينيكالىق اۋرۋحاناسىندا رەسەيلىك مامانداردىڭ قاتىسۋىمەن ءۇش كۇندىك شەبەرلىك ساعاتى ءوتتى.
ءىس-شارا بارىسىندا بەلگىلى ورتوپەد-تراۆماتولوگ گەورگيي چيبيروۆ پەن ورحان گاتاموۆ №2 بقكا دارىگەرلەرىمەن بىرلەسىپ، اۋىر نەيروورتوپەديالىق كەمىستىكتەرگە شالدىققان قازاقستاندىق 4 بالاعا بىرەگەي وتا جاسادى، دەپ حابارلايدى aqshamnews.kz.
جوعارى تەحنولوگيالىق مەديسينالىق كومەك ءمامس قاراجاتى ەسەبىنەن جاسالدى.
«ءبىزدىڭ كلينيكادا ءبىر مەزەتتە كوپ دەڭگەيلى وتا جاساۋ تاجىريبەسى بەلسەندى تۇردە قولدانىلادى. كوپ دەڭگەيلى وپەراسيا بارىسىندا انەستەزيا دا ءبىر رەت قولدانىلادى، ءبىزدىڭ ماماندار بىرنەشە مانيپۋلياسيانى كەزەڭ-كەزەڭمەن جۇزەگە اسىرا الادى. ال مۇنداي وتالاردى ورتوپەديا سالاسىندا جيناقتاعان تاجىريبەسى مول رەسەيلىك ارىپتەستەرمەن بىرلەسىپ جاساۋ پاسيەنتتەرگە كورسەتىلگەن حيرۋرگيالىق كومەكتىڭ ناتيجەسىن ەسەلەندىرە تۇسەتىنى حاق. ونىڭ ۇستىنە، ۇنەمى ءوزارا تاجىريبە الماسۋدىڭ سىرقاتتاردى ەمدەۋدە اتقارار ءرولى دە زور»، - دەپ اتاپ ءوتتى №2 بقكا ديرەكتورى مارات راباندياروۆ.
شەبەرلىك ساباعى بارىسىندا ناۋقاستار كونسۋلتاسيا الدى، دارىگەرلەر بالالاردىڭ سەرەبرالدى سال اۋرۋىنا شالدىققان سىرقاتتارعا وپەراتيۆتىك ەم جاساۋدىڭ قوسىمشا تەحنيكالارىن مەڭگەردى. بارلىعى ءتۇرلى مەديسينا ۇيىمدارىندا ەڭبەك ەتەتىن 16 مامان بىلىكتىلىگىن ارتتىرىپ، تاجىريبە الماسۋعا مۇمكىندىك الدى.
№2 بقكا تراۆماتولوگ-ورتوپەدى ۇلجان سولتانبەكوۆانىڭ ايتۋىنشا، نەيروورتوپەديالىق كەمىستىككە، اسىرەسە سەرەبرالدى سال اۋرۋىنا شالدىققان بالالارعا كوپ دەڭگەيلى وتا جاساۋ قيىن، دەگەنمەن وتە قاجەت. سەبەبى اياق-قول كەمىستىگى تىزە بۋىنى، جىلىنشىك، جامباس، تابان ت.ب. ورگانداردىڭ قىزمەتىن بۇزادى. SEMLS ءادىسى سەرەبرالدى سال اۋرۋىمەن اۋىراتىن بالالارعا ءبىر مەزەتتە بىرنەشە وتا جاساپ، اياق-قول كەمىستىگىن رەتتەۋگە مۇمكىندىك بەرەدى. بۇل وپەراسيالار پاسيەنتتەردىڭ ءومىر ساپاسىن جاقسارتۋعا، اۋىرسىنۋدى تومەندەتۋگە، قيمىل-قوزعالىس اپپاراتىنداعى كەمىستىكتەر مەن بالانىڭ ءجۇرىسىن تۇزەتىپ، جاقسارتۋعا، كەمىستىك سالدارىن ازايتۋعا باعىتتالعان ءارى وتادان كەيىنگى قالىپقا كەلۋ مەرزىمىن دە قىسقارتادى.
نيەۆرولوگيالىق دەرتتەرمەن اۋىراتىن بالالاردى دارىگەرگە دەر شاعىندا قاراتۋ وتە ماڭىزدى، ولار نيەۆرولوگتاردىڭ تۇراقتى باقىلاۋىندا بولىپ، تاعايىندالعان ەم مەن ورتوپەديالىق قۇرىلعىلاردى بەلسەندى تۇردە پايدالانۋى ءتيىس، دەيدى ماماندار.