الماتىدا 600-دەن استام جاس سارباز وتانعا ادال قىزمەت ەتۋگە انت بەردى

الماتىدا 600-دەن استام جاس سارباز وتانعا ادال قىزمەت ەتۋگە انت بەردى سۋرەت: aqshamnews.kz

الماتى قالاسىنداعى كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىندە ەلىمىزدىڭ تۇكپىر-تۇكپىرىنەن شاقىرىلعان 600-دەن اسا مەرزىمدى اسكەري قىزمەتشىنىڭ انت قابىلداۋ ءراسىمى ءوتتى.

جاس ساربازدار قارۋلى كۇشتەردىڭ قاتارىنا قابىلدانا وتىرىپ، وتان الدىنداعى پارىزىن ادال اتقارۋعا سالتاناتتى تۇردە سەرت بەردى. اسكەري انت ءار ساربازدىڭ جەكە قول قويۋى ارقىلى راسىمدەلىپ، ولاردىڭ اسكەري بورىشىنا دەگەن جاۋاپكەرشىلىگىن ايقىنداي ءتۇستى.

ۇلتتىق ۇلاننىڭ داستۇرىنە ساي وتكىزىلگەن راسىمگە اسكەري ءبولىمنىڭ ارداگەرلەرى، ساربازداردىڭ اتا-انالارى مەن تۋعان-تۋىستارى، “سارباز انالارى” كوميتەتىنىڭ وكىلدەرى، بۇقارالىق-اقپارات قۇرالدارىنىڭ وكىلدەرى قاتىستى.

ءىس-شاراعا كەلگەن اتا-انالار دا ەرەكشە اسەرىمەن ءبولىستى. سولاردىڭ ءبىرى ماڭعىستاۋ وبلىسىنان كەلگەن پەريزات شەكەربەكوۆا: «ۇلىمنىڭ بۇگىن وتانعا ادال قىزمەت ەتۋگە انت بەرگەنىن كورىپ، جۇرەگىم تولقىدى. بالامنىڭ ەر جەتىپ، ەلگە قورعان بولاتىن ازامات بولعانىنا ماقتانامىن. ءبارى امان بولسىن، ەل تىنىش بولسىن»، — دەدى.

سالتاناتتى راسىمنەن كەيىن انت قابىلداعان جاس ساربازدار دا ويىن ورتاعا سالدى.

سولاردىڭ ءبىرى قاتارداعى جاۋىنگەر ەركەبۇلان كەلدىبايەۆ:

«اسكەري فورما كيىپ، وتان الدىندا انت بەرۋ — ءاربىر جىگىتتىڭ ومىرىندەگى ەڭ جاۋاپتى كۇندەردىڭ ءبىرى دەپ ويلايمىن. ەندى بىزگە ارتىلعان سەنىمدى اقتاپ، ەل تىنىشتىعىن قورعاۋ ءۇشىن ايانباي قىزمەت ەتەمىز»، — دەدى.

انت قابىلداعان سوڭ، جاس ساربازدار ەكى اپتا بويى جاۋىنگەرلىك قىزمەتكە بەيىمدەلىپ، الماتى قالاسىنىڭ تىنىشتىعىن قامتاماسىز ەتۋگە باعىتتالعان مىندەتتەردى مەڭگەرەدى. العاشقى ون كۇندە ولار قوعامدىق ءتارتىپ پەن قاۋىپسىزدىكتى ساقتاۋدىڭ قىر-سىرىن تەوريالىق تۇردە وقىپ-ۇيرەنىپ، كەيىن تاجىريبەلىك ماشىقتان وتەدى. ارنايى سىناقتان سۇرىنبەي وتكەن ساربازدار جاۋىنگەرلىك قىزمەتتى دەربەس اتقارۋعا جىبەرىلەدى.

ايتا كەتەيىك، 1992 جىلى قازاقستان رەسپۋبليكاسى پرەزيدەنتىنىڭ جارلىعىمەن قۇرىلعان ىشكى اسكەر، قازىرگى ۇلتتىق ۇلان بۇگىندە قالا كوشەلەرىندەگى قوعامدىق ءتارتىپتى ساقتاۋ، قىلمىس پەن تەرروريزمگە قارسى كۇرەس، مەملەكەتتىك ماڭىزدى نىسانداردى جانە تۇزەۋ مەكەمەلەرىن كۇزەتۋ، سوتتالعانداردى ايداۋىلداۋ سياقتى ماڭىزدى مىندەتتەردى ابىرويمەن ورىنداپ كەلەدى.

ءىس-شارا سوڭىندا مىڭعا جۋىق اسكەريلەر مەن اسكەري وركەستر اباي قۇنانباي ۇلىنىڭ 180 جىلدىعىنا ارناپ، «كوزىمنىڭ قاراسى» ءانىن حورمەن ورىنداپ، شىمكەنت قالاسىنداعى 6506 اسكەري بولىمىنە چەللەندج جولدادى.

ءسىزدىڭ رەاكسياڭىز؟
ۇنايدى
0
ۇنامايدى
0
كۇلكىلى
0
شەكتەن شىققان
0
سوڭعى جاڭالىقتار

17:29

17:04

15:37

13:51

12:18

11:49

11:11

10:26

09:10

08:49

08:35

22:34

22:18

22:17

22:15

13:33

12:05

10:50

10:35

10:23

09:20

08:40

07:41

22:51

22:11