سانيتاريالىق-ەپيدەميولوگيالىق باقىلاۋ دەپارتامەنتىنە بيىل تاعامنان ۇشىندى دەگەن كۇدىكپەن 46 ءوتىنىش كەلىپ تۇسكەن. سوعان وراي 18 جوسپاردان تىس تەكسەرۋ جۇرگىزىلىپ، كوپشىلىك تاماقتاناتىن 3 جەردىڭ تازالىققا قاتىستى تالاپتى بۇزعانى انىقتالدى. وڭىرلىك كوممۋنيكاسيالار قىزمەتىندە دەپارتامەنت باسشىسىنىڭ ورىنباسارى گاۋحار قاتكەنوۆا وسىلاي دەدى.
سپيكەردىڭ ايتۋىنشا، بۇلار ءونىمنىڭ جارامدىلىق مەرزىمى مەن ساقتاۋ تالابىن ساقتاماعاننان، قىزمەتكەرلەردىڭ جەكە مەديسينالىق كىتاپشالارى بولماي، تاماق ءپىسىرىپ، تاراتار كەزدە قۇرال-جابدىقتاردى دۇرىس قولدانباعاننان بولعان. تەكسەرۋ قورىتىندىسى بويىنشا زاڭدى تۇلعالارعا جالپى سوماسى 943،7 مىڭ تەڭگە كولەمىندە ايىپپۇل سالىنىپتى.
الماتىدا بيىل 3 ادامنىڭ بوتۋليزممەن اۋىرعانى دا تىركەلگەن. بارلىق ناۋقاس قاجەتتى مەديسينالىق كومەك الدى. گاۋحار قاتكەنوۆانىڭ ايتۋىنشا، تاماقتان ۇشىنۋ ءقاۋپى نەگىزىنەن مەرەكە كۇندەرى، سونىڭ ىشىندە جاڭا جىل قارساڭى مەن ءىس-شارالار بولىپ جاتقان كەزدە جيىلەپ كەتەتىن كورىنەدى.
تاعامنان ۇشىنۋدىڭ نەگىزگى بەلگىلەرى – جۇرەك اينىپ، قۇسۋ، ءىشتىڭ اۋىرۋى، ءىش ءوتىپ، باس اينالۋ، السىزدىك. اۋىر جاعدايدا دەنە قىزۋى كوتەرىلەدى، بوتۋليزم كەزىندە كوزدىڭ كورۋى ناشارلاپ، جۇتىنۋ قيىنداپ، بۇلشىقەتتە ءال بولمايدى.
"العاشقى بەلگىلەر پايدا بولعان جاعدايدا اركىم ءوزىن-وزى ەمدەۋمەن اينالىسىپ كەتپەي، دەرەۋ مەديسينالىق كومەككە جۇگىنۋى كەرەك. بۇل اسقىنۋدىڭ الدىن الۋعا مۇمكىندىك بەرەدى"، – دەيدى گاۋحار قاتكەنوۆا.
ساراپشىنىڭ ايتۋىنشا، الماتىدا كوبىنە مايونەز قوسىلعان سالاتتاردى، تەرميالىق وڭدەۋدەن دۇرىس وتپەگەن ەت پەن بالىق تاعامىن تۇتىنعاندا، سونداي-اق ۇزاق تۇرىپ قالعان دايىن تاعامداردى جەگەن كەزدە ۇشىنىپ قالادى.
دەپارتامەنت مەرەكەلىك كەزەڭدە تاعام قاۋىپسىزدىگىن ساقتاۋ ءۇشىن مىنانداي ەرەجەلەردى قاپەرگە الۋدى ۇسىنادى:
- تەز بۇزىلاتىن ونىمدەردى +2…+4 °C تەمپەراتۋرادا ساقتاۋ؛
- دايىن تاعامدى بولمە تەمپەراتۋراسىندا 2 ساعاتتان ارتىق ۇستاماۋ؛
- ەتتى، بالىق پەن جۇمىرتقانى تولىق تەرميالىق وڭدەۋدەن وتكىزۋ؛
- ۇيدە جاسالعان كونسەرۆىلەردى تۇتىنۋدان باس تارتۋ؛
- ءيىسى، سىرتقى ءتۇرى كۇماندى نەمەسە مەرزىمى وتكەن ونىمدەردى قولدانباۋ؛
- ۇشىنعان جاعدايدا دارىگەرگە قارالىپ، كۇدىكتى تاعام قالدىقتارىن مۇمكىن بولسا تەكسەرۋ ءۇشىن ساقتاپ قالۋ كەرەك.