بۇل - «شەتسىز قالا» باعدارلاماسى اياسىندا جۇزەگە اسىرىلعان جوبا.
مەرەكە قارساڭىندا الماتى قالاسى مەدەۋ اۋدانى دۋمان شاعىناۋدانىندا «شىڭعا ورلەۋ» جاڭا الەۋمەتتىك كلۋبىنىڭ اشىلۋ سالتاناتى ءوتتى، دەپ حابارلادى Almaty-akshamy.kz.
اتالمىش كلۋبتا تاقىرىپتىق كەشتەر، شەبەرلىك سىنىپتارى، قىزىقتى ادامدارمەن كەزدەسۋلەر، دارىستەر، اشىق اسپان استىنداعى سپورتتىق ساباقتار، شاعىن اۋدان تۇرعىندارى ءۇشىن ەكسكۋرسيالار وتكىزىلدى. الەۋمەتتىك كلۋبقا بالالار قاتىسا الادى، ال ولارعا زەينەت جاسىنداعى ادامدار ساباق بەرەدى.
«شىڭعا ورلەۋ» – الماتى اكىمى باقىتجان ساعىنتايەۆتىڭ تاپسىرماسى بويىنشا «شەتسىز قالا» باعدارلاماسى اياسىندا جۇزەگە اسىرىلعان جوبا. وسى باستامانىڭ ارقاسىندا ءاربىر الماتىلىق، تۇرعىلىقتى جەرىنە قاراماستان، تەڭ ءومىر ءسۇرۋ ستاندارتتارىنا يە بولادى.
الەۋمەتتىك كلۋبتىڭ اشىلۋى كارانتيندىك شەكتەۋ شارالارىنا بايلانىستى ونلاين-فورماتتا قاتىسۋشىلاردىڭ ەڭ از سانىمەن ءوتتى. بۇل جوبانىڭ ماقساتى - از قامتىلعان وتباسىلاردان شىققان باستاۋىش مەكتەپ جاسىنداعى بالالارعا ومىرلىك تاجىريبەنى، ءبىلىم مەن داعدىلاردى بەرۋدىڭ ۇيلەسىمدى پروسەسىن قالىپتاستىرۋ ارقىلى اعا بۋىن وكىلدەرى مەن مۇمكىندىگى شەكتەۋلى ادامداردى قوعامدىق ومىرگە تارتۋ.
«شىڭعا ورلەۋ» الەۋمەتتىك كلۋبىنا كوپ بالالى جانە از قامتىلعان وتباسىلاردىڭ بالالارى تەگىن بارا الادى. جوبا 1-4 سىنىپ وقۋشىلارىنىڭ تۇلعالىق دامۋىنا قولايلى جاعداي جاساپ قانا قويماي، سونىمەن قاتار وسكەلەڭ جانە اعا بۋىن اراسىنداعى ساباقتاستىق پرينسيپتەرىن قالىپتاستىرا وتىرىپ، تۇرمىسى تومەن ءارى كوپبالالى وتباسىلارعا قولداۋ كورسەتەدى.
كوپ بالالى انا ءبيبىنۇر شيرالييەۆا بۇل جوبانىڭ دۋمان شاعىناۋدانىنا قاجەت ەكەنىن ايتتى.
«بۇل اۋداندا كوپ بالالى وتباسىلار جانە بالالارى ءوسىپ كەلە جاتقان جاس وتباسىلار كوپ. "شىڭعا ورلەۋدىڭ" ارقاسىندا بالالاردىڭ دامۋىنا، ولاردىڭ تاربيەسىنە كوڭىل بولىنەدى. دەمالىستا جانە ساباقتان تىس ۋاقىتتا ولار مۋزىكامەن اينالىسا الادى، ۇيىرمەلەرگە قاتىسىپ، تاجىريبەسى بار اعا بۋىننان ءبىلىم الادى. ءوز كەزەگىندە اعا بۋىن ءۇشىن بۇل ورتالىق جۇمىسىن جالعاستىرۋعا مۇمكىندىك بەرەدى. زەينەتكەرلەر ساباق جۇرگىزەدى»، – دەيدى ءبيبىنۇر شيرالييەۆا.
