الماتى قالاسىندا تەحنيكالىق جانە كاسىپتىك ءبىلىم بەرۋ سالاسىن دامىتۋعا باعىتتالعان كەزەكتى ماڭىزدى قادام جاسالدى. 2025 جىلعى 28 قاراشادا «الماتى ەنەرگەتيكا جانە ەلەكتروندى تەحنولوگيالار كوللەدجىندە» «KAZ ENERGO POWER» ج ش س جانە «Legrand» ج ش س سەرىكتەستىگىمەن جابدىقتالعان جاڭا وقۋ شەبەرحانالارىنىڭ اشىلۋ سالتاناتى ءوتتى. شاراعا اۋدان اكىمدىگىنىڭ وكىلدەرى، اۋداندىق ءبىلىم بولىمدەرىنىڭ ماماندارى، كوللەدج ديرەكتورلارى جانە كوللەدج وقىتۋشىلار قاتىستى.
بۇل باستاما مەملەكەت باسشىسى جاريالاعان «جۇمىسشى ماماندىقتار جىلى» اياسىندا جۇزەگە اسىرىلىپ، جاستاردىڭ ەڭبەك نارىعىندا باسەكەگە قابىلەتتى كاسىبي مامان بولىپ قالىپتاسۋىنا مۇمكىندىك بەرەدى. جاڭا شەبەرحانالار 07130100 «ەلەكتر جابدىقتارى»، 07130200 «ەلەكترمەن جابدىقتاۋ» ماماندىقتارى بويىنشا ءبىلىم الۋشىلارعا زاماناۋي تەحنولوگيالارمەن جۇمىس ىستەۋگە، وندىرىستىك جاعدايدا تاجىريبەسىن جەتىلدىرۋگە جاعداي جاسايدى.
اتالعان وقۋ كەڭىستىگى كوللەدجدىڭ الەۋمەتتىك سەرىكتەسى – «KAZ ENERGO POWER» ءجشس-نىڭ قولداۋىمەن تولىقتاي جابدىقتالدى. كومپانيا – ىشكى جانە سىرتقى ورناتۋعا ارنالعان جيىنتىق تاراتۋ قۇرىلعىلارى، جيىنتىق ترانسفورماتورلىق قوسالقى ستانسيالار، ستاندارتتى جانە ستاندارتتى ەمەس تاراتۋ شكافتارىن وندىرەتىن وتاندىق جەتەكشى كاسىپورىنداردىڭ ءبىرى.
كاسىپورىن كەلەسى باعىتتار بويىنشا جوعارى ساپالى ەلەكتروتەحنيكالىق ونىمدەر شىعارادى:
جوعارى كەرنەۋلى ەلەكتر جابدىقتارى؛
تومەن كەرنەۋلى ەلەكتر جابدىقتارى؛
ستاندارتتى ەمەس ەلەكتروتەحنيكالىق قۇرىلعىلار؛
جيىنتىق ترانسفورماتورلىق قوسالقى ستانسيالار.
سونىمەن قاتار كومپانيا جەتكىزىلەتىن جابدىقتاردىڭ جوبالاۋ، مونتاجداۋ، ىسكە قوسۋ-باپتاۋ، سەرۆيستىك جانە كەپىلدىك قىزمەتتەرىن تولىق قامتاماسىز ەتەدى. بۇل شەبەرحانا ستۋدەنتتەردىڭ ەنەرگەتيكالىق جۇيەلەردى اۆتوماتتاندىرۋ جانە رەلە قورعانىسى بويىنشا وزەكتى داعدىلاردى مەڭگەرۋىنە مۇمكىندىك بەرەدى.
«Legrand ProLab – بولاشاق مامان» شەبەرحاناسى
ەكىنشى جاڭا وقۋ كەڭىستىگى — «Legrand» ءجشس-نىڭ قولداۋىمەن ىسكە اسىرىلدى. Legrand – تۇرعىن ءۇي، كوممەرسيالىق جانە ونەركاسىپتىك نىساندارعا ارنالعان ەلەكتروجابدىقتارى مەن قۇرىلىمدىق كابەلدىك جۇيەلەردىڭ حالىقارالىق دەڭگەيدەگى ءوندىرۋشىسى جانە جەتكىزۋشىسى.
كومپانيانىڭ نەگىزگى ءونىم باعىتتارى: روزەتكالار، قوسقىشتار جانە مودۋلدىك قۇرىلعىلار؛ اۆتوماتتى اجىراتقىشتار جانە قورعانىس ەلەمەنتتەرى؛ كابەل ارنالارى مەن مودۋلدىك پانەلدەر؛ ەلەكتر جانە سيفرلىق ينفراقۇرىلىمعا ارنالعان كەشەندى شەشىمدەر.
Legrand وندىرەتىن جابدىقتاردى جوبالاۋ، مونتاجداۋ، ىسكە قوسۋ جانە سەرۆيستىك قولداۋدى تولىق قامتىپ وتىرادى. جاڭا شەبەرحانا ءبىلىم الۋشىلاردىڭ زاماناۋي ەلەكترمونتاج جۇمىستارىن مەڭگەرۋىنە، سيفرلىق ينفراقۇرىلىم ەلەمەنتتەرىمەن جۇمىس ىستەۋ بىلىكتىلىگىن ارتتىرۋعا باعىتتالعان.
جاڭا شەبەرحانالاردىڭ اشىلۋى — دۋالدى وقىتۋ جۇيەسىن كۇشەيتۋدىڭ، الەۋمەتتىك سەرىكتەستىك اياسىن كەڭەيتۋدىڭ جانە تەحنيكالىق ماماندىقتاردىڭ بەدەلىن ارتتىرۋدىڭ ناقتى قادامى. كوللەدج باسشىلىعىنىڭ ايتۋىنشا، مۇنداي وقۋ ورتالىقتارى ستۋدەنتتەردىڭ كاسىبي قۇزىرەتتىلىگىن ارتتىرىپ قانا قويماي، وندىرىستىك ورتاعا بەيىمدەلۋىن جىلدامداتادى.
الماتى ەنەرگەتيكا جانە ەلەكتروندى تەحنولوگيالار كوللەدجى الداعى ۋاقىتتا دا سەرىكتەس ۇيىمدارمەن بىرلەسكەن جوبالاردى جۇزەگە اسىرىپ، ەڭبەك نارىعىنا قاجەتتى بىلىكتى ماماندار دايارلاۋدى جالعاستىرماق.