الماتى حالىقارالىق اۋەجايىنىڭ اۋماعىندا 21 ءساۋىر كۇنى ساعات 09:00-دەن 17:00-گە دەيىن جوسپارلى انتيتەررورلىق وقۋ-جاتتىعۋ وتكىزىلدى.
شارا اۋەجاي عيماراتى ورنالاسقان مايلين كوشەسى، 2 مەكەنجايىندا بولدى، دەپ حابارلايدى aqshamnews.kz.
بۇل وقۋ-جاتتىعۋ — ادامدار كوپ شوعىرلاناتىن ورىنداردا بولۋى مۇمكىن تەررورلىق ارەكەتتەردىڭ الدىن الۋ جانە ولارعا دەرەۋ ارەكەت ەتۋ مەحانيزمدەرىن جەتىلدىرۋگە باعىتتالعان كەشەندى شارا. جاتتىعۋعا ءتۇرلى مەملەكەتتىك ورگانداردىڭ قىزمەتكەرلەرى قاتىستى.
ۇيىمداستىرۋشىلاردىڭ ايتۋىنشا، وقۋ-جاتتىعۋ كەزىندە اۋە رەيستەرى مەن اۆتوكولىك قوزعالىسىنا شەكتەۋ قويىلمادى. دەگەنمەن، تۇرعىندار مەن جولاۋشىلاردان قاۋىپسىزدىك تالاپتارىن ساقتاپ، قۇقىق قورعاۋ ورگاندارى قىزمەتكەرلەرىنىڭ زاڭدى تالاپتارىن ورىنداۋ سۇرالدى.
سونىمەن قاتار، ازاماتتاردان تەك رەسمي اقپارات كوزدەرىنە سۇيەنىپ، جالعان نەمەسە راستالماعان مالىمەتتەر تاراتپاۋعا شاقىرىلادى. بۇل قوعامدا نەگىزسىز ۇرەي مەن الاڭداۋشىلىقتىڭ الدىن الۋ ءۇشىن ماڭىزدى.
ايتا كەتەيىك، ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 443-بابىنا سايكەس، قوعامدىق ءتارتىپتى قامتاماسىز ەتۋمەن اينالىساتىن تۇلعالاردىڭ زاڭدى تالابىنا باعىنباعان ازاماتتار اكىمشىلىك جاۋاپكەرشىلىككە تارتىلادى.