الماتى اكىمى دارحان ساتىبالدى قازاقستانداعى ءۇندىستان رەسپۋبليكاسىنىڭ توتەنشە جانە وكىلەتتى ەلشىسى سايلاس تانگالمەن كەزدەستى. تاراپتار ساۋدا-ەكونوميكالىق، ينۆەستيسيالىق جانە تۋريستىك سالالارداعى ەكىجاقتى ىنتىماقتاستىقتى كەڭەيتۋ جوبالارىن تالقىلادى.
2025 جىلى قاڭتار-ماۋسىم ايلارىندا قازاقستان مەن ءۇندىستان اراسىنداعى تاۋار اينالىمى 547 ملن اقش دوللارىنان استى، ونىڭ ىشىندە 183 ملن دوللارى الماتىعا تيەسىلى. بۇعان قوسا، اتالعان كەزەڭدە قالاعا ءۇندىستاننان 56 مىڭنان استام تۋريست كەلدى، بۇل وتكەن جىلمەن سالىستىرعاندا 16% كوپ.
دارحان ساتىبالدى الماتىنى ەلىمىزدىڭ مادەني، عىلىمي، ىسكەرلىك جانە قارجىلىق ورتالىعى ەكەنىن اتاپ ءوتتى. قازاقستان رەسپۋبليكاسىنىڭ جالپى وڭىرلىك ءونىمىنىڭ بەستەن ءبىر بولىگى – الماتىدا.
جان باسىنا شاققانداعى جالپى وڭىرلىك ءونىم 27 مىڭ اقش دوللارىنا تەڭ، ال بولجام بويىنشا 2025 جىلدىڭ قورىتىندىسى بويىنشا ەكونوميكالىق ءوسىم 6،4% دەڭگەيىندە بولماق.
قالا اكىمى مەگاپوليستىڭ ينۆەستيسيالىق تارتىمدىلىعىنا ەرەكشە توقتالدى. 2024 جىلى الماتىعا شامامەن 5،7 ملرد دوللار كولەمىندە ينۆەستيسيا تارتىلدى، بۇل وتكەن جىلمەن سالىستىرعاندا 8،2% ارتىق. ونىڭ شامامەن 90%-ى جەكە ينۆەستيسيا. بۇگىندە قالادا ءۇندى كاپيتالى تارتىلعان 258 كاسىپورىن جۇمىس ىستەيدى.
تۋريستىك بايلانىستى دامىتۋعا دا ايرىقشا كوڭىل ءبولىندى. تىكەلەي اۋە قاتىناسىن كەڭەيتۋ ۇلكەن ءرول اتقارىپ كەلەدى. الماتىدان دەلي مەن مۋمبايعا تۇراقتى رەيستەر، سونداي-اق گواعا ماۋسىمدىق رەيستەر اشىلعان.
كەزدەسۋ قورىتىندىسى بويىنشا الماتى اكىمى سەرىكتەستىكتىڭ بولاشاعى زور باعىتتارى رەتىندە IT-سەكتوردى، فارماسيەۆتيكانى، وڭدەۋشى ونەركاسىپتى جانە جاڭا تەحنولوگيانى اتادى.
«قازاقستان مەن ءۇندىستان اراسىنداعى قارىم-قاتىناستار بارلىق باعىتتا دامي بەرەدى، بۇل ەكى حالىقتىڭ باۋىرلاستىق بايلانىسىن نىعايتادى دەپ سەنەمىن. كەزدەسۋ ءۇشىن العىس بىلدىرەمىن جانە ودان ءارى جەمىستى ىنتىماقتاستىققا ءۇمىت ارتامىن»، – دەدى دارحان ساتىبالدى.
ايتا كەتەيىك، 2025 جىلى قازاقستان مەن ءۇندىستان اراسىندا ديپلوماتيالىق قاتىناس ورناعانىنا 33 جىل تولدى.