الماتى اكىمى دارحان ساتىبالدى جاساندى ينتەللەكت سالاسىنداعى جەتەكشى قىتايلىق iFLYTEK كومپانياسىنىڭ تمد ەلدەرىنە ارنالعان باس ديرەكتورى حان مينسزە مىرزامەن كەزدەستى، - دەپ حابارلايدى Aqshamnews.kz.
كەزدەسۋ بارىسىندا كومپانيا وكىلدەرى ءبىلىم سالاسىنا ارنالعان تەحنولوگيالىق شەشىمدەرىن تانىستىردى. اتاپ ايتقاندا، «ءمۇعالىم – ماشينا – وقۋشى» قاعيداتى بويىنشا جۇمىس ىستەيتىن ۆيرتۋالدى كومەكشىسى بار ينتەراكتيۆتى تاقتالار مەن پلانشەتتەر ۇسىنىلدى. مۇنداي سيفرلىق شەشىمدەر وقىتۋ ۇدەرىسىنىڭ تيىمدىلىگىن ارتتىرۋعا جانە وقۋشىلاردىڭ وقۋ ماتەريالىن مەڭگەرۋ دەڭگەيىن كۇشەيتۋگە باعىتتالعان.
دارحان ساتىبالدى بۇل باعىتتى دامىتۋعا قىزىعۋشىلىق ءبىلدىرىپ، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «جاساندى ينتەللەكت داۋىرىندەگى قازاقستان: وزەكتى مىندەتتەر جانە ولاردى سيفرلىق ترانسفورماسيا ارقىلى شەشۋ» جولداۋىندا جۇكتەگەن تاپسىرمالار اياسىندا ءبىلىم بەرۋ جۇيەسىن جاڭعىرتۋ، ادامي كاپيتالدى دامىتۋ جانە بىلىكتى كادرلار دايارلاۋ بويىنشا بەلسەندى جۇمىس جۇرگىزىلىپ جاتقانىن اتاپ ءوتتى. سونداي-اق ول مەكتەپكە دەيىنگى تاربيە مەن جالپى ءبىلىم بەرۋدەن باستاپ جوعارى وقۋ ورىندارى مەن عىلىمعا دەيىن بارلىق دەڭگەيدە ءبىلىم ساپاسى مەن قولجەتىمدىلىگىن ارتتىرۋ باسىمدىق ەكەنىن ايتتى.
كەزدەسۋ قورىتىندىسى بويىنشا الماتى اكىمى iFLYTEK كومپانياسىنىڭ تاجىريبەسىن جان-جاقتى زەردەلەۋدى جانە ۇسىنىلعان شەشىمدەردى وتاندىق ءبىلىم بەرۋ ستاندارتتارىنا بەيىمدەۋ مۇمكىندىگىن قاراستىرۋدى تاپسىردى.