الماتى اكىمى دارحان ساتىبالدى ەۋروپالىق قايتا قۇرۋ جانە دامۋ بانكىنىڭ ورتالىق ازيا جانە موڭعوليا ەلدەرى بويىنشا باسقارۋشى ديرەكتورى حۋسەين وزحانمەن جۇمىس كەزدەسۋىن وتكىزدى. تاراپتار قالالىق ينفراقۇرىلىمدى جاڭعىرتۋ سالاسىنداعى ىنتىماقتاستىقتى تەرەڭدەتۋ جانە بىرلەسكەن جوبالاردى جۇزەگە اسىرۋ ماسەلەلەرىن تالقىلادى.
دارحان ساتىبالدى الماتى قازاقستانداعى ينۆەستيسيالىق تارتىمدىلىعى جوعارى وڭىرلەردىڭ ءبىرى بولىپ قالا بەرەتىنىن اتاپ ءوتتى. سوڭعى ءۇش جىلدا مەگاپوليسكە تارتىلعان ينۆەستيسيا كولەمىنىڭ جىلدىق ورتاشا ءوسىمى 16% بولدى. حالىقارالىق Fitch اگەنتتىگى الماتىنىڭ كرەديتتىك رەيتينگىن «BBB+» دەڭگەيىندە راستادى، بۇل ەقدب جەلىسى ارقىلى دا سىرتتان قارجى تارتۋعا قولايلى جاعداي جاسايدى.
كەزدەسۋ بارىسىندا ەكولوگيالىق كولىك جوبالارىن جۇزەگە اسىرۋعا ارنالعان «جاسىل» وبليگاسيا شىعارۋ، ونىڭ ىشىندە LRT قۇرىلىسى، ەلەكترواۆتوبۋستارعا ارنالعان ينفراقۇرىلىم قۇرۋ جانە تارتقىش قوسالقى ستانسيالاردى جاڭعىرتۋ سياقتى قازىرگى جانە كەلەشەكتەگى باستامالار تالقىلاندى.
سونىمەن قاتار، الماتىدا حالىقارالىق قارجى ينستيتۋتتارىنان تىكەلەي قارىز الۋ مۇمكىندىگى بار ەكەنى اتاپ ءوتىلدى. 2025 جىلى قالانىڭ سىرتقى قارىز الۋ ءليميتى 2،3 ملرد اقش دوللارىنا دەيىن ۇلعايتىلدى، بۇل «جاسىل» قارجىلاندىرۋ مەحانيزمدەرىن بەلسەندى ەنگىزۋگە جانە قالالىق ورتانىڭ ساپاسىن ارتتىرۋعا باعىتتالعان اۋقىمدى ينفراقۇرىلىمدىق جوبالاردى ىسكە اسىرۋعا مۇمكىندىك بەرەدى.
كەزدەسۋ سوڭىندا تاراپتار ستراتەگيالىق ارىپتەستىككە قىزىعۋشىلىق تانىتىپ، الماتىنىڭ تۇراقتى دامۋى اياسىندا ودان ءارى ءوزارا ءىس-قيمىلعا دايىن ەكەندىكتەرىن ءبىلدىردى.