الماتى قالاسىنىڭ اكىمى باقىتجان ساعىنتايەۆ ءوزىنىڭ facebook-تەگى الەۋمەتتىك پاراقشاسىندا: «ۇلتتىق ستاتيستيكا بيۋروسىنىڭ مالىمەتىنشە، ءقازىردىڭ وزىندە قازاقستاندىقتار 19 ميلليونعا جەتتى. ال الماتى حالقىنىڭ سانى ەكى ميلليوننان استى! ايالا جامبىل ەكى ميلليونىنشى تۇرعىن اتاندى. ول پوليسيا قىزمەتكەرى بەيبىت ابىلدايەۆ پەن بالاباقشا تاربيەشىسى ءاليا جانىبەكوۆانىڭ وتباسىنداعى التىنشى قىز. دەنساۋلىق، اماندىق پەن باقىت تىلەيمىن!» دەگەن حابارلاما جاريالادى، دەپ حابارلايدى Almaty-akshamy.kz.
ەسكە سالا كەتسەك، قازاقستاننىڭ ون توعىز ميلليونىنشى تۇرعىنى رەتىندە تىركەلگەن جانيا ازامات قىزى الماتى قالاسىندا دۇنيەگە كەلدى. قازاقستان پرەزيدەنتى قاسىم-جومارت توقايەۆ Twitter-دە قازاقستان حالقى 19 ميلليون ادامعا جەتكەنىن حابارلاعان بولاتىن. مەملەكەت باسشىسى ون توعىز ميلليونىنشى ازاماتتىڭ اتا-اناسى مەن قازاقستاندىقتاردى وسى قۋانىشپەن قۇتتىقتادى.