30-دان استام قازاقستاندىق ماگيسترانت پەن دوكتورانت «اباي-ۆەرن» باعدارلاماسى بويىنشا فرانسيادا تەگىن ءبىلىم الا الادى
«اباي-ۆەرن» ۇتقىرلىق ءبىلىم بەرۋ باعدارلاماسىنا قاتىسۋ ءۇشىن وتىنىشتەردى قابىلداۋ باستالدى. باعدارلاما بويىنشا 30-دان استام قازاقستاندىق ماگيسترانت پەن دوكتورانت فرانسيادا تەگىن ءبىلىم الا الادى. ۇتقىرلىق باعدارلاماسى كوروناۆيرۋستىق پاندەمياعا بايلانىستى موراتوريي ەنگىزىلگەننەن كەيىن ءبىر جىل وتكەن سوڭ قايتا جۇزەگە اسىرىلا باستادى. ءبىلىم جانە عىلىم ءمينيسترى اسحات ايماعامبەتوۆ پەن فرانسيانىڭ قازاقستانداعى ەلشىسى ديدە كانەسس فرانكو-قازاقستاندىق ستيپەنديا تۋرالى كەلىسىمگە وزگەرىستەر ەنگىزۋ تۋرالى حاتتاماعا قول قويدى، دەپ حابارلادى Almaty-akshamy.kz ق ر ءبىلىم جانە عىلىم مينيسترلىگىنىڭ سايتىنداعى حابارعا سىلتەمە جاساپ.
2021-2022 وقۋ جىلىندا ەكىنشى كۋرستىڭ 30 ماگيسترانتى جانە قازاقستان مەن فرانسياداعى عىلىمي جەتەكشىلەرمەن بىرلەسىپ ديسسەرتاسيا دايىندايتىن 5 دوكتورانت «اباي-ۆەرن» ستيپەندياسىنىڭ يەگەرى اتانا الادى.
«اباي-ۆەرن» ستيپەندياسى ماگيسترانتتار مەن دوكتورانتتارعا فرانسۋز جانە اعىلشىن تىلدەرىندە فرانسيا ۋنيۆەرسيتەتتەرىندە وقۋ ءۇشىن بەرىلەدى. ۇمىتكەرلەردىڭ فرانسۋز جوعارى وقۋ ورنىنا نەمەسە عىلىمي-زەرتتەۋ ورتالىعىنا ماگيستراتۋرا مەن دوكتورانتۋرا باعدارلامالارى بويىنشا وقۋعا الدىن الا قابىلدانعاندىعى تۋرالى راستاۋ حاتى بولۋى ءتيىس»، - دەپ اتاپ ءوتتى ق ر بعم حالىقارالىق ىنتىماقتاستىق دەپارتامەنتى ديرەكتورىنىڭ م.ا. ەلميرا اسان.
«اباي-ۆەرن» ستيپەندياسىن جەڭىپ العان ماگيسترانتتارعا ۇلتتىق بانك باعامى بويىنشا اي سايىن 800 ەۆرو، دوكتورانتتارعا 1200 ەۆرو مولشەرىندە ستيپەنديا تولەنەدى. سونداي-اق ستيپەندياتتار فرانسياداعى ۋنيۆەرسيتەت جاتاقحاناسىندا ورىن الۋعا ارتىقشىلىقتى قۇقىقتارعا يە بولىپ، ۇزاق مەرزىمدى ستۋدەنتتىك ۆيزا جانە فرانسۋزدىق الەۋمەتتىك ساقتاندىرۋ جۇيەسىنە تەگىن تىركەلە الادى.
«اباي-ۆەرن» اكادەميالىق ۇتقىرلىق باعدارلاماسى بويىنشا قۇجاتتاردى قابىلداۋ 2021 جىلدىڭ 4 شىلدەسىنە دەيىن جالعاسادى. كانديداتتاردى ىرىكتەۋدى فرانكو-قازاقستاندىق تاۋەلسىز كوميسسيا جۇرگىزەدى.
«اباي-ۆەرن» - بۇل ق ر ءبىلىم جانە عىلىم مينيسترلىگى مەن فرانسيانىڭ ەۋروپا جانە سىرتقى ىستەر مينيسترلىگىنىڭ بىرلەسكەن ستيپەنديالىق باعدارلاماسى. كەلىسىمگە قول قويىلعان كەزدەن باستاپ 158 قازاقستاندىق ماگيسترانت پەن دوكتورانت بەدەلدى «اباي-ۆەرن» حالىقارالىق ستيپەندياسىنىڭ يەگەرى اتانعان.