Búgín Almaty qalasynda ekí kúnge sozylatyn "Túrkí álemíníń medıa keńístígí: jańa dáuírdegí míndetter men múmkíndíkter" atty VI Halyqaralyq túrkítíldes jurnalıster medıa forumy óz jūmysyn bastady. Forumǵa Túrkí álemínen, Europadan, memlekettík qūrylymdardan jáne medıa ūıymdardan kelgen sarapshylar, jurnalıster men sala mamandary qatysuda. Alqaly jıynda túrkí halyqtarynyń ortaq aqparattyq keńístígín qalyptastyru, medıa salasyndaǵy jańa trendter, zamanauı tehnologıyalardyń yqpaly jáne yntymaqtastyqty tereńdetu máselelerí keńínen talqylandy.
Alǵashqy sóz Túrkítíldes jurnalıster qorynyń prezıdentí Názıya Joyamergenqyzyna beríldí. Ol óz sózínde forumnyń negízgí maqsaty túrkítíldes jurnalısterdíń kásíbı áleuetín arttyru, ortaq jobalar arqyly túbí bír túrkí halyqtarynyń mádenı-ruhanı qūndylyqtaryn dárípteu ekenín atap óttí.
"Ókíníshke qaraı, jetpís jyldan astam ústemdík etken keńestík júıeníń saldarynan búgíngí kúní túrkí elderí bírín-bírí tolyq tanı bermeıdí. Tíldík, mádenı jaqyndastyq álsírep, ártúrlí alfavıtterdíń qoldanyluy ózara túsínístíktí tejedí. Osy olqylyqtyń ornyn toltyru úshín Túrkítíldes jurnalıster qory qazaq jáne túrkí jurnalısterín bíríktíríp, ortaq jobalar arqyly aqparattyq baılanystardy nyǵaıtuǵa múddelí", - dedí ol.
Forumnyń negízgí taqyryby, Túrkıyany qosa alǵanda, barlyq túrkí memleketíne ortaq aqparattyq keńístík qalyptastyru bolyp otyr. Prezıdent óz sózínde turızm, PR, mádenı jáne tarıhı jobalar arqyly aqparattyq yqpaldastyqty arttyrudyń mańyzyn atap óttí. Ol búgíngí medıanyń tez ózgeríp jatqanyn, tsıfrlyq ortadaǵy jańa tehnologıyalardyń jurnalısterge jańa míndetter júkteıtínín aıtty.
"Sol úshí aqparattyq tehnologıyalardyń damuy bízge úlken múmkíndíkter ūsynyp otyr. Jańa medıa, tsıfrlyq formattar, jasandy ıntellekt, būlardyń barlyǵy medıanyń bet-beınesín túbegeılí ózgertíp jatyr. Bíz osy múmkíndíkterdí túrkí elderí arasyndaǵy ortaq jobalardy damytuǵa tıímdí paıdalanuymyz qajet", - dedí qor basshysy.
Ol sondaı-aq sońǵy jyldary júzege asqan mańyzdy bastamalarǵa toqtaldy. Bıyl 16-20 qazanda Bryussel qalasynda ótken V Halyqaralyq medıa forumnyń qorytyndysymen Qazaqstan, Belgıya jáne Nıderland bírlesíp Dúnıejúzílík Túrkí medıa assotsıatsıyasyn qūrǵanyn atap óttí. Áríptesterdíń ūsynysymen assotsıatsıya prezıdentí bolyp ózí saılanǵanyn da aıtty.
"Búgíngí forum ayasynda Germanıyanyń ūıymǵa qosyluy kútílude. Ázerbaıjan men Qyrǵyzstan da qosyluǵa múddelílík tanytyp otyr. Eń basty maqsat ortaq aqparattyq keńístíktí qalyptastyryp, túrkí halyqtaryn bír-bíríne jaqyndatu bolmaq", - dedí ol.
Ol sonymen qatar derektí fılmder túsíru, kásíbı baıqaular ūıymdastyru, onlaın jáne oflaın formattaǵy semınarlar ótkízu sekíldí aldaǵy jobalarǵa toqtaldy. "Túrkítíldes jurnalıster qory toǵyz jyldan berí "Erkín sóz" baıqauyn, sondaı-aq Halyq bankí jáne Chevron kompanıyasymen bírlesken
"Qoǵam aınasy" jobasyn ūıymdastyryp keledí. Endí būl baıqaulardy búkíl túrkí álemín qamtıtyn deńgeıge kóterudí josparlap otyrmyz", - dedí qor prezıdentí.
Forumda sóz alǵan Qazaqstan Respublıkasy Mádenıet jáne aqparat mınıstrlígíníń Aqparat komıtetí Baspa BAQ-qa aqparattyq jūmys basqarmasynyń basshysy Quanysh Igíman óz qūttyqtauynda túrkí elderí arasyndaǵy aqparattyq yqpaldastyqtyń strategıyalyq mańyzyn erekshe atap óttí.
"Būl forum – ortaq ıdeyalarymyzdy toǵystyryp, ózara tájírıbe almasuǵa múmkíndík beretín mańyzdy alań. Tarıhy, mádenıetí jáne tílí jaqyn halyqtar úshín ortaq medıa keńístíktí damytu tek kásíbı míndet emes, ruhanı jáne strategıyalyq qajettílík", - dedí ol.
Mınıstrlík ókílí aqparat salasyndaǵy syn-qaterlerge de toqtaldy.
"Aqparat legíníń shekten tys artuy, tsıfrlyq platformalardyń ústemdígí, gıbrıdtík aqparattyq qauípter osylardyń barlyǵy medıa salasynda jańa tásílder ázírleudí talap etedí. Osy oraıda jasandy ıntellekttíń rólí erekshe. Ol jurnalıstıkanyń formatyn ózgertíp, redaktsıyalardyń jūmysyn jeńíldetíp qana qoımaı, aqparattyń jańa sapasyn qalyptastyryp jatyr", - dedí ol.
Qorytyndylaı kele, ol ortaq aqparattyq keńístíktí qalyptastyrudyń mańyzy zor ekenín, túrkí álemí jurnalısteríníń yntymaqtastyǵy odan árí tereńdeı túsetíníne sením bíldírdí.
Forumda Almaty qalasy Íshkí sayasat basqarmasy basshysynyń orynbasary Sherehan Dastan da sóz sóıledí. Ol Almaty qalasy ákímdígíníń atynan forumǵa qatysushylardy qūttyqtap, ís-sharanyń mańyzyn atap óttí.
"Medıa forumnyń jūmysyna sáttílík tíleımín. Halyqaralyq deńgeıde ótíp jatqan mūndaı ís-sharanyń mańyzy óte zor. Sebebí medıa salasynyń ókílderí úshín tájírıbe almasu, píkír bólísu – aqparattyq keńístíkte atqarylatyn jūmystyń sapasyn arttyruǵa jáne jańa serpín beruge yqpal etedí", - dedí ol.
Sonymen bírge, ol forumdy ūıymdastyruǵa úles qosqan azamattarǵa rızashylyǵyn bíldírdí.
"Osyndaı mańyzdy sharany joǵary deńgeıde ūıymdastyrushylarǵa shyn alǵysymyzdy bíldíremíz. Al túrkí álemíníń aqparattyq yntymaqtastyǵyn damytu baǵytynda bastamashy bolyp júrgen Názıya Joyamergenqyzynyń eńbegín erekshe atap ótken jón", - dedí ol. Spıker forumnyń aldaǵy ekí kún íshínde mazmūndy árí nátıjelí ótetíníne sením bíldírdí.
Almatyda ótíp jatqan būl alqaly jıyn túrkí álemíníń aqparattyq keńístígín damytu, medıa saladaǵy ózara qoldau men yntymaqtastyqty nyǵaıtu, ortaq qūndylyqtardy keńínen nasıhattau baǵytyndaǵy mańyzdy qadam bolyp otyr. Forumnyń nátıjesínde túrkí elderí arasyndaǵy aqparattyq baılanystar jańa deńgeıge kóterílíp, jurnalıster arasyndaǵy kásíbı seríktestík odan árí bekítíledí dep kútílíp otyr.