Almaty qalasynda memleket jáne qoǵam qaıratkerí, Qazaqstannyń Eńbek Erí, Halyq jazushysy, kórnektí aqyn Oljas Súleımenovtíń 90 jyldyq mereıtoıyna arnalǵan saltanatty kontserttík kesh ūıymdastyryldy, – dep habarlaıdy aqshamnews.kz tílshísí.
Ís-shara Almaty qalasy ákímdígíníń qoldauymen óttí.
Saltanatty jıynǵa zıyaly qauym ókílderí, aqyn-jazushylar, mádenıet qaıratkerlerí, studentter men qala tūrǵyndary jınaldy. Keshtíń basty maqsaty – qazaq ruhanıyatynyń bıík tūlǵasyna aınalǵan Oljas Súleımenovtíń ádebı jáne qoǵamdyq eńbegín ūlyqtau boldy.
Jıynda Almaty qalasy ákímíníń orynbasary Abzal Núkenūly Memleket basshysynyń arnaıy qūttyqtau hatyn oqyp, aqynnyń el tarıhy men mádenıetíne qosqan zor úlesín erekshe atap óttí. Sonymen qatar, bírqatar belgílí tūlǵalar da qūttyqtau sóz sóılep, ízgí tílekterín bíldírdí.
Aqyn Bauyrjan Jaqyp óz sózínde Oljas Súleımenovtíń shyǵarmashylyq jáne azamattyq bolmysyn joǵary baǵalady:
-«Ūly aqyn Oljas Súleımenov 90 jasqa tolyp otyr. Búgín ruhanıyatty súıetín qauym túgel jınaldy. Onyń ǵūmyry – qazaq balasyna úlgí. Jastaıynan jarq etíp tanylyp, London, Parıj, Nyu-Iork syndy álemníń írí qalalarynda shyǵarmashylyq keshterín ótkízdí. Onyń barlyq eńbegí óz halqyna, ūltyna arnaldy. Ásírese Alash qaıratkerlerín aqtauǵa, Jeltoqsan oqıǵasyna qatysqan jastardyń aqtaluyna qosqan úlesí – erekshe», – dedí ol.
Kesh tek qūttyqtau sózdermen shektelmeı, mazmūndy kontserttík baǵdarlamaǵa ūlasty. Sahna tórínde qazaq óneríníń maıtalmandary men jas oryndaushylar óner kórsetíp, kórermenge ruhanı áser syılady. Án men kúı áuelep, ūlttyq muzyka men zamanauı kompozıtsıyalar úılesím tapty. Saltanatty kesh sońynda kórermender Oljas Súleımenovtíń qazaq ádebıetí men álemdík mádenıettegí ornyn erekshe atau ústínde boldy. Būl mereıtoılyq kesh ūlt ruhanıyatynyń bıík belesí retínde este qaldy.
Ayajan Quanysheva