Qyrǵyz Respublıkasy Mınıstrler kabınetí tóraǵasynyń orynbasary Edıl Baısalov Almatyǵa megapolıste júzege asyrylyp jatqan ūlttyq jobalarmen tanysu úshín jūmys saparymen keldí.
Eń aldymen «Jaıly mektep» ūlttyq jobasy ayasynda salynǵan №214 mektepte boldy. Qazaqstannyń Oqu-aǵartu vıtse-mınıstrí Maıra Meldebekova Almatyda 34800 oryndyq 21 jaıly mektep salynyp jatqanyn, onyń íshínde segíz nysannyń qūrylysy ayaqtalǵanyn aıtty.
Būl joba audany shamamen 14,6 myń sharshy metrdí qūraıtyn keń jáne zamanauı ǵımarattar saludy kózdeıdí jáne tıptík mektepterdíń standartty parametrlerínen 20% asyp túsedí. Ǵımarattardyń arhıtekturasy jan-jaqty oılastyrylǵan: korpustar ár túrlí jastaǵy oqushylar úshín yńǵaıly jáne qauípsíz orta qūruǵa múmkíndík beretín bílím deńgeılerí boıynsha bólíngen.
Sondaı-aq, Qyrǵyzstannan kelgen delegatsıya Alatau audanynda ornalasqan Ūlttyq ǵylymı jūqpaly aurular ortalyǵyna bardy. Aumaǵy 12 gektardy alyp jatqan ǵımarat 350 orynǵa eseptelgen. QR Densaulyq saqtau mınıstrí Aqmaral Álnazarova atalǵan ortalyq patsıentterdí oqshaulaudyń ınnovatsıyalyq ádísí qoldanylatynyn, atap aıtsaq, qysym gradıentín baqylaıtyn mamandandyrylǵan jartylaı boksty-palatalar jabdyqtalǵanyn atap óttí.
Delegatsıya Áuezov audanynyń komyunıtı-ortalyǵynda da boldy. Meımandarǵa QR Mádenıet jáne aqparat vıtse-mınıstrí Qanat Ysqaqov mádenıet jáne bílím salasynda júzege asyrylyp jatqan tyń jobalar turaly aıtyp berdí. Qyrǵyz delegatsıyasy qazaqstandyq jastar úshín jasalyp jatqan zamanauı qadamdarǵa úlken baǵasyn berdí.
– Bíz búgín mektepte boldyq, auruhanaǵa bardyq. Jastarǵa arnalǵan ortalyqtyń da tynys-tírshílígímen tanystyq. Ashyǵyn aıtqanda, sízderde medıtsına, bílím jáne áleumettík sala óte joǵary deńgeıde damyǵan. Qazaqstannan kelgen áríptestermen bíz halyqaralyq forumdar men konferentsıyalarda jıí júzdesemíz. Árkez píkír almasyp otyramyz. Bíz Europa, Ortalyq Azıya, AQSh jáne Afrıka tájírıbesín zertteuge tyrysamyz. Ótken jyly Qazaqstannyń Premer-mınıstrí Oljas Bektenov Qyrǵyzstanǵa keldí. Sol júzdesude kerí baılanys ornatu turaly sūradyq. Bízdíń elge írgeles jatqan megapolıs – Almaty, sondyqtan osy qalany tańdadyq. Mūnda júzege asyrylyp jatqan jobalardy zerdeleu bíz úshín mańyzdy. Ekí bauyrlas halyqtyń dostyǵy berík. Kóptegen ortaq ıdeyamyz bar. Qazaqstan qazír belsendí damyp keledí, árdaıym alǵa jyljuda. Al Qyrǵyzstan sol kóshten qalmauǵa ūmtylyp keledí, – dedí Qyrǵyz Respublıkasy Mınıstrler kabınetí tóraǵasynyń orynbasary Edıl Baısalov.
Delegatsıya Áleumettík qyzmetter úıíníń jūmysyna da qyzyǵushylyq tanytty. Būl – almatylyqtarǵa «Bír tereze» qaǵıdaty boıynsha memlekettík jáne áleumettík sıpattaǵy qyzmetterdí jedel aluǵa múmkíndík beretín bíregeı joba.
Qyrǵyz elínen kelgen áríptester Sátbaev unıversıtetínde de bolyp, qazaqstandyq joǵary oqu oryndary bazasynda ashylǵan sheteldík fılıaldardyń jūmysy, ınfraqūrylymy, ǵylymy jáne Qazaqstannyń alǵashqy tehnıkalyq unıversıtetíníń ǵylymı jobalarymen tanysty. Meımandar unıversıtettíń negízgí ǵylymı jáne bílím beru bólímshelerín aralap, Stroytech tehnologıyalyq parkí, Halyqaralyq ozyq funktsıonaldyq materıaldar jáne olardyń kompozıtterí jóníndegí R&D ortalyǵy, Porsche jáne Astana Motors audıtorıyalarynda boldy. Ásírese City University of Hong Kong fılıaly men MIT FabLab óndírístík zerthanasyna basa nazar audaryldy.
Būl sapar Qazaqstan men Qyrǵyzstan elderí arasynda bílím, ǵylym, densaulyq jáne áleumettík salalardaǵy ınnovatsıya boıynsha yntymaqtastyqty nyǵaıtuda taǵy bír mańyzdy qadam boldy.