Almaty men oblysta bıylǵy kóktem bírqalypty jyly bolady. Mausymnyń bírínshí jartysynda bírese jyly, bírese salqyndau bolyp, jauyn-shashynnyń mólsherí edáuír artady. Óńírlík kommunıkatsıyalar qyzmetíndegí kóktemgí su tasqyny kezeńíne daıyndyqqa arnalǵan baspasóz konferentsıyasynda «Qazgıdromet» RMK-nyń Almaty men Almaty oblysyndaǵy bólímshesíníń meteorologıyalyq boljamdar bólímíníń basshysy Dáulet Kísebaev aldaǵy uaqytqa osyndaı boljam ūsyndy.
Spıkerdíń aıtuynsha, kún raıy ótpelí mausymǵa tán sıpatta bolady. Nauryz aıynda óńír boıynsha ortasha aua temperaturasy klımattyq normaǵa juyq, Almaty oblysynyń soltústík-batysynda bír gradusqa joǵary bolady dep boljanyp otyr. Sáuírde oblys aumaǵynyń basym bólígínde temperatura normadan bír gradusqa joǵary bolyp, tau bókterí men tauly audandarda qalypty shekte saqtalady. Mamyr aıynda temperaturalyq fon tūraqtanyp, búkíl oblys boıynsha klımattyq normaǵa sáıkes bolady.
«Kóktemde jylda kún qūbylyp tūrady osylaı. Bıyl da solaı bolady. Kún jylyp, qaıta salqyndap tūrady. Bíraq asa bír kún qatty suyp, qatty ysyp ketetíndeı jaǵdaı bola qoımaıdy. Būl kóktemge tán qalypty jaǵdaı, oǵan qalalyq qyzmetter jaqsy daıyndalǵan», – deıdí Dáulet Kísebaev.
Almaty boıynsha jeke boljam da ūsyndy. Nauryz aıynda temperatura aıtarlyqtaı auytquy múmkín: aıdyń bírínshí onkúndígínde túngí temperatura −5…−10 gradusqa deıín tómendeuí yqtımal, ekínshí onkúndíkte kúndíz +23 gradusqa deıín jylynady, aı sońynda az uaqytqa salqyndauy múmkín. Sáuír men mamyrda ortasha aua temperaturasy bírtíndep joǵarylaıdy.
Nauryz ben sáuír aıynda Almatyda jauyn-shashynnyń mólsherí ádettegíden kóp bolady degen boljam bar. Nauryzda klımattyq norma 72 mm bolsa, ásírese aıdyń bírínshí jáne úshínshí onkúndígínde jańbyr men qar aralas jauyn-shashyn jıí jauady. Sáuírde norma 112 mm bolǵanymen, jauyn-shashyn mólsherí kóp boluy yqtımal. Mamyrda jauyn-shashyn kólemí ortasha kópjyldyq kórsetkíshterge sáıkes, shamamen 99 mm deńgeıínde bolady.
«Sáuír men mamyr Almatyda eń jańbyrly aı sanalady. Būl uaqytta jauyn-shashynnyń kóbeyuí bír tótenshe jaǵdaı emes, óńírdíń klımattyq erekshelígí sondaı ózí. Bíz boljamdy keńes beru sıpatynda jasap, jańa derekterge qaraı ony naqtylap otyramyz únemí», – dep atap óttí Dáulet Kísebaev.
Sınoptıkterdíń baǵalauynsha, bıylǵy kóktem Almaty qalasy men oblysta ádettegídeı qalypty ótpek. Qalalyq jáne tótenshe qyzmetterge būl aldyn alu men daıyndyq jūmysyn josparly túrde júrgízuge múmkíndík beredí.
